നിങ്ങളുടെ ചാറ്റ് ഞങ്ങൾ കാണുന്നില്ല ; സ്റ്റാറ്റസിലൂടെ വിശദീകരണവുമായി വാട്സാപ്പ്
ന്യൂഡല്‍ഹി: വാട്സാപ്പിന്റെ സ്വകാര്യത നയം അടുത്തിടെ ഏറെ ചര്‍ച്ച ചെയ്യപ്പെട്ട വിഷയമാണ്. കമ്ബനിയുടെ വിശ്വാസ്യതയ്ക്ക് തന്നെ വലിയ തിരിച്ചടിയായ സംഭവത്തില്‍ സ്റ്റാറ്റസിലൂടെ വിശദീകരണവുമായി എത്തിയിരിക്കുകയാണ് കമ്ബനി. ഓരോ ഉപഭോക്താവിന്റെയും സ്റ്റാറ്റസ് സെക്ഷനിലാണ് വാട്സാപ്പ് പ്രത്യേക സന്ദേശം പ്രദര്‍ശിപ്പിച്ചിരിക്കുന്നത്. ഉപയോക്താക്കളുടെ സ്വകാര്യത സംരക്ഷിക്കാന്‍ പ്രതിജ്ഞാബദ്ധമാണെന്നും സ്വകാര്യ സംഭാഷണങ്ങള്‍ സുരക്ഷിതമായിരിക്കുമന്നും കമ്ബനി വ്യക്തമാക്കുന്നു. നാല് സ്റ്റാറ്റസുകളാണ് തങ്ങളുടെ പുതിയ നയം വ്യക്തമാക്കാന്‍ കമ്ബനി ഓരോ ഉപഭോക്താവിന്റെയും സ്റ്റാറ്റസ് സെക്ഷനില്‍ ഉപയോഗിച്ചിരിക്കുന്നത്.
മെസേജുകള്‍ എന്‍‌ക്രിപ്റ്റ് ചെയ്യുന്നതിനാല്‍ ആരുടെയും സ്വകാര്യ സംഭാഷണങ്ങള്‍ വായിക്കുകയോ കേള്‍ക്കുകയോ ചെയ്യുന്നില്ലെന്നും വാട്ട്സ്‌ആപ്പിന്‍റെ സ്റ്റാറ്റസ് പറയുന്നു. വാട്ട്സ്‌ആപ്പിന് നിങ്ങള്‍ ഷെയര്‍ ചെയ്ത ലൊക്കേഷന്‍ കാണാന്‍ കഴിയില്ല. വാട്‌സാപ് നിങ്ങളുടെ കോണ്‍‌ടാക്റ്റുകള്‍ ഫെയ്സ്ബുക്കുമായി പങ്കിടുന്നില്ലെന്നും സ്റ്റാറ്റസിന്റെ മൂന്നാമത്തെയും നാലാമത്തെയും സ്ലൈഡില്‍ പറയുന്നുണ്ട്.
വേണ്ടെങ്കില്‍ വാട്‌സാപ് ഉപേക്ഷിക്കൂ; സ്വകാര്യതാനയം ചോദ്യം ചെയ്ത ഹര്‍ജിക്കാരനോട് കോടതി.
അതേസമയം വാട്സാപ്പിന്റെ സ്വകാര്യതാ നയത്തില്‍ മാറ്റം വരുത്താന്‍ കമ്ബനിയോട് കേന്ദ്ര സര്‍ക്കാര്‍ ആവശ്യപ്പെട്ടു. ഏകപക്ഷീയമായ മാറ്റങ്ങള്‍ ന്യായമല്ലെന്നും സ്വീകാര്യമല്ലെന്നും മെസേജിംഗ് ആപ്പിന്റെ സ്വകാര്യതാ നയത്തിലെ സമീപകാല മാറ്റങ്ങള്‍ പിന്‍വലിക്കണമെന്നും സര്‍ക്കാര്‍ വാട്ട്‌സാപ്പിനോട് ആവശ്യപ്പെട്ടു.