ഡയപ്പര് ധരിപ്പിക്കുന്നത് കുട്ടികളുടെ വൃക്കകളെ ബാധിക്കുമോ?
കോഴിക്കോട്: പുതിയ കാലത്ത് കുട്ടികളെ ഡയപ്പർ ധരിപ്പിക്കുന്നത് വളരെ സ്വാഭാവികമാണ്. യാത്രയിലായാലും എന്തെങ്കിലും ചടങ്ങുകളില് പങ്കെടുക്കുമ്ബോഴും നാമെല്ലാവരും കുഞ്ഞുങ്ങളെ ഡയപ്പറുകള് ധരിപ്പിക്കാറുണ്ട്.
കുഞ്ഞുങ്ങളെ ഡയപ്പർ ധരിപ്പിക്കുന്ന രക്ഷിതാക്കളെ ആശങ്കപ്പെടുത്തുന്ന ചില വീഡിയോകള് സമീപ ദിവസങ്ങളിലായി വ്യാപകമായി പ്രചരിപ്പിക്കപ്പെടുന്നുണ്ട്. അതില് പറയുന്ന പ്രധാനപ്പെട്ട ഒരു കാര്യം ഡയപ്പർ ധരിപ്പിക്കുന്ന കുഞ്ഞുങ്ങള്ക്ക് വൃക്കരോഗം വരും എന്നതാണ്. എന്താണ് അതിന്റെ യാഥാർത്ഥ്യം ?
പരിശോധനക്ക് എത്തിയ ആളുകളോട് ഒരു ഡോക്ടർ നല്കുന്ന നിർദേശം പോലെയാണ് ഈ വീഡിയോ പ്രചരിക്കുന്നത്. എന്നാല്, അതിന്റെ ശാസ്ത്രീയ വശം പരിശോധിക്കുകയാണ് ശിശുരോഗ വിദഗ്ധനും സോഷ്യല് മീഡിയ ഇൻഫ്ലുവൻസറുമായ ഡോ.ഇമ്രാൻ പട്ടേല്. ‘ഡയപ്പർ ക്യാൻസറിന് കാരണമാവും വൃക്ക രോഗത്തിന് കാരണമാവും എന്ന രീതിയിലുള്ള പ്രചാരണം സമൂഹമാധ്യമങ്ങളില് സജീവമാണ്. ഡയപ്പറുകള് കൃത്യസമയത്ത് മാറ്റിയില്ലെങ്കില് ക്യാൻസറല്ല കുട്ടിയുടെ ശരീരത്തില് തിണർപ്പാണ് ഉണ്ടാവുക’ എന്നാണ് ഇമ്രാൻപട്ടേല് പറയുന്നത്. വൃക്കരോഗം വരും എന്ന പ്രചാരണവും ഡോക്ടർ തള്ളിക്കളയുകയാണ്. കൃത്യമായി വെള്ളം കുടിച്ചില്ലെങ്കിലോ ശരിയായ രീതിയില് മൂത്രം ഒഴിച്ചില്ലെങ്കിലോ ആണ് വൃക്കരോഗങ്ങള്ക്ക് കാരണമാവുന്നതെന്നും ഡയപ്പറുകള് ഉപയോഗിക്കുന്നതിനുള്ള മാർഗനിർദേശവും അദ്ദേഹം വിഡിയോയില് നല്കുന്നുണ്ട്.
കൃത്യമായ ഇടവേളകളില് ഡയപ്പറുകള് മാറ്റുക, ദിവസത്തില് മൂന്നോ-നാലോ തവണ ഡയപ്പറുകള് മാറ്റണം. ഒരു ദിവസത്തില് നിശ്ചിതസമയം ഡയപ്പർ ധരിപ്പിക്കാതിരിക്കുക എന്നിവയാണ് ഡോക്ടറുടെ മാർഗനിർദേശങ്ങള്. തെറ്റായ വിവരങ്ങള് നല്കി ആളുകളെ പരിഭാന്ത്രരാക്കാതെ ഇരിക്കണമെന്നും പറഞ്ഞാണ് ഡോക്ടറുടെ വീഡിയോ അവസാനിപ്പിക്കുന്നത്. വിഡിയോക്ക് താഴെ നിരവധി ആളുകളാണ് ഇമ്രാൻപട്ടേലിന് നന്ദി അറിയിച്ച് വന്നിരിക്കുന്നത്.