മോഹൻലാൽ വയനാട്ടിൽ;ടെറിട്ടോറിയൽ ആർമിയുടെബേസ് ക്യാംപിൽ എത്തി
കൽപ്പറ്റ: ഉരുള്പൊട്ടലില് തകര്ന്നടിഞ്ഞ വയനാട്ടില് നടന് മോഹന്ലാല് എത്തി. ലെഫ്റ്റനന്റ് കേണല് കൂടിയായ മോഹന്ലാല് മേപ്പാടി എത്തിയപ്പോള് സൈന്യം സ്വീകരിച്ചു. സൈനിക യൂണിഫോമിലാണ് മോഹന്ലാല് എത്തിയത്. ഉരുള്പ്പൊട്ടല് ഏറെ ബാധിച്ച മുണ്ടക്കൈ സന്ദര്ശിക്കും.
നേരത്തെ മുഖ്യമന്ത്രിയുടെ ദുരിതാശ്വാസ നിധിയിലേക്ക് 25 ലക്ഷം രൂപ താരം സംഭാവന ചെയ്തിരുന്നു.മോഹന്ലാല് പങ്കുവെച്ച വൈകാരികമായ കുറിപ്പും ഏറെ ശ്രദ്ധനേടിയിരുന്നു.
‘വയനാട് ദുരന്തബാധിതര്ക്ക് ആശ്വാസം പകരാന് നിസ്വാര്ത്ഥരായ സന്നദ്ധപ്രവര്ത്തകര്, പോലീസുകാര്, ഫയര് ആന്ഡ് റെസ്ക്യൂ, എന്ഡിആര്എഫ്, സൈനികര്, സര്ക്കാര് ഉദ്യോഗസ്ഥര് തുടങ്ങി അക്ഷീണം പ്രയത്നിക്കുന്ന ഓരോ വ്യക്തിയുടെയും ധൈര്യത്തെ ഞാന് സല്യൂട്ട് ചെയ്യുന്നു.
ദുരിതാശ്വാസ ദൗത്യത്തില് മുന്നിരയില് നിന്ന എന്റെ 122 ഇന്ഫന്ട്രി ബറ്റാലിയന് ടിഎ മദ്രാസിന്റെ പ്രയത്നങ്ങള്ക്ക് ഞാന് നന്ദിയറിയിക്കുന്നു.
നമ്മള് മുമ്പും വെല്ലുവിളികളെ അഭിമുഖീകരിക്കുകയും കൂടുതല് ശക്തരാകുകയും ചെയ്തിട്ടുണ്ട്. ഈ ദുഷ്കരമായ സമയത്ത് ഒറ്റക്കെട്ടായി നില്ക്കാനും നമ്മുടെ ഒരുമയുടെ കരുത്ത് കാട്ടാനും ഞാന് അഭ്യര്ത്ഥിക്കുന്നു. ജയ്ഹിന്ദ്,’ മോഹന്ലാലിന്റെ വാക്കുകള്.
വയനാട് ഉരുള്പൊട്ടല് ദുരിതബാധിതരുടെ പുനരധിവാസത്തിനായി നാടിന്റെ വിവിധ ഭാഗങ്ങളില്നിന്നും സഹായമെത്തുകയാണ്. മമ്മൂട്ടി, ദുല്ഖര് സല്മാന്, ടൊവിനോ, ആസിഫ് അലി, മഞ്ജു വാര്യര്, നയന്താര, നവ്യാ നായര്, ഫഹദ് ഫാസില്, നസ്രിയ, പേളി മാണിയും ശ്രീനിഷും തുടങ്ങിയ താരങ്ങളും ദുരിതാശ്വാസ നിധിയിലേക്ക് സഹായങ്ങള് നല്കിയിരുന്നു. ദുരിതാശ്വാസ നിധിയിലേക്ക് മമ്മൂട്ടിയും ദുല്ഖര് സല്മാനും 35 ലക്ഷം രൂപ കൈമാറി. ആദ്യഘട്ടമായി മമ്മൂട്ടി 20 ലക്ഷം രൂപയും ദുല്ഖര് 15 ലക്ഷം രൂപയുമാണ് ദുരിതാശ്വാസ നിധിയിലേക്ക് നല്കിയത്. തുക മന്ത്രി പി രാജീവ് ഏറ്റുവാങ്ങി. മമ്മൂട്ടി കെയര് ഫൗണ്ടേഷന്റെ ഭാഗമായാണ് തുക കൈമാറിയത്.
കാര്ത്തിയും സൂര്യയും ജ്യോതികയും ചേര്ന്ന് 50 ലക്ഷം രൂപ മുഖ്യമന്ത്രിയുടെ ദുരിതാശ്വാസനിധിയിലേക്ക് നല്കിയിരുന്നു. നടന്മാരായ കമല്ഹാസന്, വിക്രം എന്നിവര് 20 ലക്ഷം രൂപയും നടി രശ്മിക മന്ദാന 10 ലക്ഷം രൂപയും നല്കി. ഫഹദ് ഫാസിലും നസ്രിയയും ചേര്ന്ന് 25 ലക്ഷമാണ് സംഭാവനചെയ്തത്.