അസമില് 90 വോട്ടര്മാരുള്ള ബൂത്തില് വോട്ടു ചെയ്തത് 171 പേര്: അഞ്ച് ഉദ്യോഗസ്ഥര്ക്ക് സസ്പെന്ഷന്
ഹാഫ്ലോംങ്: തൊണ്ണൂറ് വോട്ടർമാരുള്ള ബൂത്തിൽ 171 വോട്ടുകൾ രേഖപ്പെടുത്തിയ സംഭവത്തിൽ അഞ്ച് പോളിങ് ഉദ്യോഗസ്ഥർക്ക് സസ്പെൻഷൻ. അസമിലെ ദിമ ഹസാവോ ജില്ലയിലാണ് സംഭവം. ഏപ്രിൽ ഒന്നിനായിരുന്നു ഹാഫ്ലോംങ് മണ്ഡലത്തിൽ വോട്ടെടുപ്പ്.
സംഭവം വെളിച്ചത്തുവന്നതിനെത്തുടർന്ന് അഞ്ച് പോളിങ് ഉദ്യോഗസ്ഥരെ സസ്പെന്റ് ചെയ്തു. ബൂത്തിൽ വീണ്ടും വോട്ടെടുപ്പ് നടത്തുമെന്ന് തെരഞ്ഞെടുപ്പ് കമ്മീഷൻ വ്യക്തമാക്കി. ഏപ്രിൽ രണ്ടിന് ഉദ്യോഗസ്ഥരെ സസ്പെന്റ് ചെയ്തിരുന്നെങ്കിലും തിങ്കളാഴ്ചയാണ് വിവരം പുറത്തായത്.
ബൂത്തിലെ വോട്ടേഴ്സ് ലിസ്റ്റിൽ 90 ആളുകളുടെ പേര് വിവരങ്ങളാണ് ഉണ്ടായിരുന്നത്. എന്നാൽ 171 വോട്ടുകൾ ചെയ്തതായാണ് വ്യക്തമാകുന്നതെന്ന് വാർത്താ ഏജൻസിയായ പിടിഐ റിപ്പോർട്ട് ചെയ്തു.
ഗ്രാമമുഖ്യൻ തെരഞ്ഞെടുപ്പ് കമ്മീഷന്റെ വോട്ടർ പട്ടിക അംഗീകരിച്ചില്ലെന്നും അദ്ദേഹം നൽകിയ പട്ടിക പ്രകാരമാണ് വോട്ടെടുപ്പ് നടന്നതെന്നും ഉദ്യോഗസ്ഥരിൽ ഒരാൾ പറഞ്ഞു. എന്തുകൊണ്ടാണ് പോളിങ് ഉദ്യോഗസ്ഥർ ഗ്രാമമുഖ്യന്റെ ആവശ്യം അംഗീകരിച്ചതെന്ന് വ്യക്തമല്ല. സ്ഥലത്ത് സുരക്ഷാ പ്രശ്നങ്ങൾ ഉണ്ടായിരുന്നോയെന്നും വ്യക്തതയില്ല