കേന്ദ്ര സർക്കാർ നയം മാറ്റിയിട്ടും ക്ലച്ച് പിടിച്ചില്ല; ടെസ്ല ഇന്ത്യയിലേക്കില്ലെന്ന് റിപ്പോർട്ട്
ഇന്ത്യയിലെ നിക്ഷേപപദ്ധതിയില്‍നിന്ന് അമേരിക്കന്‍ വൈദ്യുതവാഹന നിര്‍മാതാക്കളായ ടെസ്ല പിന്‍വാങ്ങുന്നതായി റിപ്പോര്‍ട്ട്. ഇലോണ്‍ മസ്‌കിന്റെ ടെസ്ല ഇന്ത്യയില്‍ ഉത്പാദനം തുടങ്ങുമെന്നും ഇതിനായി വലിയനിക്ഷേപം നടത്തുമെന്നുമായിരുന്നു പ്രതീക്ഷിച്ചിരുന്നത്. ഇതിന്റെ ഭാഗമായി ഏപ്രിലില്‍ ഇലോണ്‍ മസ്‌ക് ഇന്ത്യ സന്ദര്‍ശിക്കാനിരുന്നതാണ്. എന്നാല്‍, അദ്ദേഹം യാത്ര ഒഴിവാക്കി. ഇതിനുശേഷം ടെസ്ല ഉദ്യോഗസ്ഥര്‍ ഇന്ത്യന്‍ അധികൃതരുമായി നിക്ഷേപവുമായി ബന്ധപ്പെട്ട തുടര്‍ചര്‍ച്ചകള്‍ക്ക് ശ്രമിച്ചിട്ടില്ലെന്നാണ് വിവരം.
വൈദ്യുതവാഹനരംഗത്ത് ചൈനീസ് കമ്പനികളുമായുള്ള മത്സരത്തില്‍ തിരിച്ചടി നേരിടുന്ന കമ്പനി ഇന്ത്യയില്‍ ഇപ്പോള്‍ നിക്ഷേപം നടത്താന്‍ സന്നദ്ധമല്ലെന്നാണ് റിപ്പോര്‍ട്ട്. തുടര്‍ച്ചയായ രണ്ടാംപാദത്തിലും ടെസ്ലയുടെ വില്‍പ്പനയില്‍ വലിയ കുറവുണ്ടായ സാഹചര്യത്തില്‍കൂടിയാണിത്. ടെസ്‌ലയ്ക്ക് പുതിയ നിക്ഷേപം നടത്തുന്നതിന് പരിമിതികള്‍ ഉണ്ടെന്നും അതുകൊണ്ട് ഇന്ത്യയില്‍ നിക്ഷേപം നടത്തുന്ന നീക്കത്തില്‍ ഉറപ്പിലെന്നുമാണ് സൂചനകള്‍.
ടെസ്ല സൈബര്‍ ട്രക്ക് എന്ന മോഡല്‍ ഈ വര്‍ഷം വിപണിയില്‍ എത്തിച്ചതിന് പിന്നാലെ നിരവധി ജീവനക്കാരെ പിരിച്ചുവിടുകയും, മെക്‌സികോയില്‍ ഒരുക്കുമെന്ന് പ്രഖ്യാപിച്ച പ്ലാന്റിന്റെ നിര്‍മാണത്തില്‍ കാലതാമസം നേരിടുകയും ചെയ്യുന്നത് ടെസ്ലയുടെ സാമ്പത്തിക പ്രതിസന്ധിയെ തുടര്‍ന്നാണെന്നാണ് വിലയിരുത്തലുകള്‍. എന്നാല്‍, ഇന്ത്യ നിക്ഷേപത്തെ കുറിച്ച് പ്രതികരിക്കാന്‍ ടെസ്ലയുടെ അധികൃതരും സര്‍ക്കാര്‍ പ്രതിനിധികളും തയാറായിട്ടില്ലെന്നാണ് റിപ്പോര്‍ട്ടുകള്‍.
ഇക്കഴിഞ്ഞ ഏപ്രിലിലാണ് ടെസ്ലയുടെ മേധാവി ഇലോണ്‍ മസ്‌ക് പ്രധാനമന്ത്രിയുമായി കൂടിക്കാഴ്ച നടത്തുന്നതിനായി ഇന്ത്യയിലെത്തുമെന്ന് അറിയിച്ചത്. എന്നാല്‍, ഏതാനും ദിവസങ്ങള്‍ക്കുള്ളില്‍ തന്നെ അദ്ദേഹം ഇന്ത്യ സന്ദര്‍ശനത്തില്‍ നിന്നും പിന്മാറുന്നതായും അറിയിച്ചിരുന്നു. ടെസ്ലയുമായി ബന്ധപ്പെട്ട തിരക്കുകള്‍ കാരണമാണ് സന്ദര്‍ശനം നീട്ടിവെക്കുന്നതെന്നായിരുന്നു മസ്‌ക് നല്‍കിയ വിശദീകരണം. ഈ വര്‍ഷം അവസാനത്തോടെ മോദിയെ കാണുമെന്നും അദ്ദേഹം സൂചിപ്പിച്ചിരുന്നു.
ഏതാനും മാസങ്ങള്‍ക്ക് മുമ്പാണ് ഇന്ത്യ പുതിയ വൈദ്യുതി വാഹനനയം പ്രഖ്യാപിച്ചത്. ഇലക്ട്രിക് വാഹനങ്ങളുടെ ഇറക്കുമതി തീരുവ 70 ശതമാനം മുതല്‍ 110 ശതമാനം വരെയായിരുന്നത് ആദ്യ അഞ്ച് വര്‍ഷത്തേക്ക് 15 ശതമാനമായാണ് കുറച്ചത്. എന്നാല്‍, നിരവധി ഉപാധികളോടെയായിരുന്നു ഈ ഇളവുകള്‍ പ്രഖ്യാപിച്ചത്. ഈ നീക്കം ടെസ്‌ലയ്ക്ക് കാര്യമായ നേട്ടമുണ്ടാകുമെന്നായിരുന്നു പ്രഥമിക വിലയിരുത്തലുകള്‍.
പുതിയ ഇലക്ട്രിക് വാഹന നയം അനുസരിച്ച് പ്രതിവര്‍ഷം 8000 യൂണിറ്റ് മാത്രമാണ് ഇളവുകളോടെ ഇന്ത്യയില്‍ ഇറക്കുമതി ചെയ്യാന്‍ അനുവദിച്ചിട്ടുള്ളത്. ഈ ഇളവ് ഉപയോഗപ്പെടുത്തുന്ന കമ്പനികള്‍ മൂന്ന് വര്‍ഷത്തിനുള്ളില്‍ ഇന്ത്യയില്‍ നിര്‍മാണം ആരംഭിക്കണമെന്നും വ്യവസ്ഥ ചെയ്യുന്നുണ്ട്. 4150 കോടി രൂപയുടെ നിക്ഷേപമാണ് കമ്പനികള്‍ നടത്തേണ്ടത്. മൂന്ന് വര്‍ഷംകൊണ്ട് 30 ശതമാനവും അഞ്ച് വര്‍ഷംകൊണ്ട് 50 ശതമാനവും ഘടകങ്ങള്‍ ഇന്ത്യന്‍ നിര്‍മിക്കണമെന്നും ഇവി നയത്തില്‍ വ്യവസ്ഥ ചെയ്യുന്നു