യുഎഇയിലെ പൊടിക്കാറ്റ്; വാഹനമോടിക്കുമ്പോൾ ഇക്കാര്യങ്ങൾ ശ്രദ്ധിക്കണം
ദുബായ്: യുഎഇയിൽ പൊടിക്കാറ്റ് രൂക്ഷമാകുന്ന ഘട്ടത്തിൽ വാഹനമോടിക്കുന്നവർ ശ്രദ്ധിക്കണം. നാഷണല് സെന്റര് ഓഫ് മെറ്റീരിയോളജി പൊടിക്കാറ്റ് ഉണ്ടാകുമ്പോൾ അറിഞ്ഞിരിക്കേണ്ട നിയമങ്ങൾ പങ്കുവച്ചിട്ടുണ്ട്. പൊടിക്കാറ്റിന്റെ സമയത്ത് വാഹനമോടിക്കുന്നത് ഏറെ വെല്ലുവിളിയുണ്ടാക്കുന്ന കാര്യമാണ്.
പൊടിക്കാറ്റ് രൂക്ഷമാകുന്ന ഘട്ടത്തിൽ ദൂരക്കാഴ്ച കുറയുമെന്നത് മാത്രമല്ല ടയറുകളില് മണല് ചിതറിക്കിടക്കുന്നത് ബുദ്ധിമുട്ട് ഉണ്ടാക്കുമെന്ന് ദുബായ് റോഡ്സ് ആന്ഡ് ട്രാന്സ്പോര്ട്ട് അതോറിറ്റി വ്യക്തമാക്കുന്നുണ്ട്. ഡ്രൈവിങ് വിദ്യാര്ഥികള്ക്കുള്ള ഔദ്യോഗിക ലേണേഴ്സ് ഹാന്ഡ്ബുക്കില്, ആര്ടിഎ പറയുന്നത് പ്രകാരം ‘റോഡുകളിലെ മണല് അപകടകരമാണ്, കാരണം ടയറുകളുടെ ഗ്രിപ്പ് കുറയുകയും റോഡിന്റെ വശങ്ങള് എവിടെയാണെന്ന് തിരിച്ചറിയാൻ കഴിയാത്ത വിധം ഇത് ബുദ്ധിമുട്ടായിത്തീരുകയും ചെയ്യും. ഇനി ഇത്തരം കാലാവസ്ഥകളിൽ റോഡില് സുരക്ഷിതരായിരിക്കാന്, നിങ്ങള് പാലിക്കേണ്ട അഞ്ച് നിയമങ്ങള് വ്യക്തമാക്കാം.
വാഹനമോടിക്കുന്നതിന് മുൻപ് വാഹനത്തിൻ്റെ ഹെഡ്ലൈറ്റുകള് പരിശോധിക്കണം. പൊടിക്കാറ്റുകള് ദൃശ്യപരത കുറയ്ക്കുമെന്നതിനാല് നിങ്ങളുടെ കാറിന്റെ ഹെഡ്ലൈറ്റുകള് പ്രവര്ത്തിക്കുന്നുണ്ടെന്ന് ഉറപ്പാക്കേണ്ടത് വളരെ പ്രധാനമാണ്. ആര്ടിഎയുടെ ഔദ്യോഗിക വെബ്സൈറ്റായ www.rta.ae യില്, ‘പൊടി നിറഞ്ഞ കാലാവസ്ഥയില് വാഹനമോടിക്കുന്നതിന് മുമ്പ് നിങ്ങളുടെ കാറുകളുടെ ഹെഡ്ലൈറ്റുകള് നന്നായി പ്രവര്ത്തിക്കുന്നുണ്ടെന്ന് ഉറപ്പാക്കണം എന്ന് വ്യക്തമാക്കിയിട്ടുണ്ട്.
വാഹനത്തിന്റെ വേഗത കുറയ്ക്കുക എന്നതാണ് മറ്റൊന്ന്, ആര്ടിഎ ഡ്രൈവിങ് വിദ്യാര്ഥികള്ക്കായി തയ്യാറാക്കിയിട്ടുള്ള ഔദ്യോഗിക ലേണേഴ്സ് ഹാന്ഡ്ബുക്കില് പറയുന്നത് പ്രകാരം എതിരെ വരുന്ന വാഹനങ്ങളില് നിന്നുള്ള പൊടി, എതിരെവരുന്ന വാഹനങ്ങള്, റോഡിലെ കുഴി അല്ലെങ്കില് വളവ് പോലുള്ള സംഭവങ്ങൾ കാണാൻ കഴിയാതെ വന്നാൽ അപകടങ്ങള്ക്ക് കാരണമാകും.
വാഹനങ്ങളുടെ ഗ്ലാസ്സുകളിൽ വന്നുപതിയുന്ന പൊടി കാഴ്ച തടസ്സപ്പെടുത്തിയേക്കാം. അതിനാൽ വേഗത കുറയ്ക്കുകയും മുന്നിലുള്ള വാഹനത്തില് നിന്ന് സുരക്ഷിതമായ അകലം പാലിക്കുകയും ചെയ്തിരിക്കണം. റോഡിന്റെ അവസ്ഥയ്ക്ക് സുരക്ഷിതമായ വേഗതയില് വാഹനമോടിക്കുകയും ചെയ്യുക . കാരണം വാഹനം നിര്ത്താന് നിങ്ങള്ക്ക് ഇത്തരം കാലാവസ്ഥകളിൽ കൂടുതല് സമയം ആവശ്യമായി വന്നേക്കാം.
വാഹനമോടിക്കുമ്പോള് ചിത്രങ്ങളോ വീഡിയോകളോ എടുക്കാതിരിക്കുക എന്നതാണ് മറ്റൊന്ന്. കുറഞ്ഞ ദൃശ്യപരിധിയുള്ള സാഹചര്യങ്ങളില് വാഹനമോടിക്കുമ്പോള് ശ്രദ്ധ ഡ്രൈവിങ്ങിൽ മാത്രമമായിരിക്കണം. വാഹനമോടിക്കുന്നവരോട് അബുദബി പോലിസ് കുറഞ്ഞ ദൃശ്യപരിധിയുള്ള സാഹചര്യങ്ങളില് വാഹനമോടിക്കുമ്പോള് ശ്രദ്ധ കേന്ദ്രീകരിക്കാന് നിര്ദേശിച്ചിരുന്നു.
ഹസാര്ഡ് ലൈറ്റുകള് ഉപയോഗിക്കാതെ ഇരിക്കുക എന്നതാണ് മറ്റൊന്ന്. പൊടിനിറഞ്ഞ സാഹചര്യങ്ങളില് വാഹനമോടിക്കുമ്പോള് വാഹനമോടിക്കുന്നവര് പാലിക്കേണ്ട നിയമങ്ങളെക്കുറിച്ച് ആഭ്യന്തര മന്ത്രാലയം അവബോധം ഉണ്ടാക്കാന് ശ്രമിച്ചിരുന്നു. വാഹനമോടിക്കുമ്പോള് ഹസാര്ഡ് ലൈറ്റുകള് ഉപയോഗിക്കരുതെന്നും നിങ്ങളുടെ പാതയിലൂടെയാണ് സഞ്ചരിക്കുന്നതെന്ന് ഉറപ്പാക്കണമെന്നും മന്ത്രാലയം വാഹനമോടിക്കുന്നവരോട് അഭ്യര്ഥിച്ചു. വാഹനങ്ങളുടെ വിന്ഡോകള് അടച്ചിടണം. സുരക്ഷയ്ക്കായി വിന്ഡോകള് അടച്ച് എസി ഓണാക്കി വയ്ക്കാൻ പ്രത്യേകം ശ്രദ്ധിക്കണമെന്ന് ആർടിഎ മുന്നറിയിപ്പ് നൽകിയിട്ടുണ്ട്.