ബലിയിടാൻ പോയ യുവാവിൽ നിന്നും പിഴത്തുക ‘അടിച്ചുമാറ്റിയ’ പൊലീസുകാരന് സസ്പെൻഷൻ
ശ്രീകാര്യം: പിതൃതർപ്പണത്തിനെത്തിയ യുവാവിൽ നിന്ന് ലോക്ക് ഡൗൺ ലംഘിച്ചെന്ന് പറഞ്ഞ് പിഴത്തുക ‘അടിച്ചുമാറ്റിയ’ പൊലീസുകാരന് സസ്പെൻഷൻ. ശ്രീകാര്യം പൊലീസ് സ്റ്റേഷനിലെ സി.പി.ഒ അരുൺ ശശിയെയാണ് സസ്പെൻഡ് ചെയ്തത്.പിഴയായി 500 രൂപയുടെ രസീത് നൽകി 2000 രൂപ വാങ്ങിയെന്ന പരാതിയിലാണ് നടപടി.സംഭവത്തിൽ സിഐയ്ക്കെതിരെ അന്വേഷണവും പ്രഖ്യാപിച്ചു. ശ്രീകാര്യം വെഞ്ചാവോട് സ്വദേശിയായ വീട്ടമ്മയ്ക്കും മകനുമെതിരെയാണ് പൊലീസ് പിഴ ചുമത്തിയത്. ഇന്നലെ രാവിലെ 10.30ന് ശ്രീകാര്യം മാർക്കറ്റിന് മുന്നിലായിരുന്നു സംഭവം.ശ്രീകാര്യം പുലിയൂർക്കോട് ശ്രീകൃഷ്‌ണസ്വാമി ക്ഷേത്രത്തിലേക്ക് കാറിൽ പോകുകയായിരുന്നു ഇരുവരും.
ക്ഷേത്രത്തിലേക്കാണെന്ന് പറഞ്ഞപ്പോൾ ലോക്ക്ഡൗൺ ആണെന്ന് അറിയില്ലേ എന്ന് പൊലീസ് ഉദ്യോഗസ്ഥൻ ആക്രോശിച്ചെന്നും, തിരികെ പോകാം എന്ന് പറഞ്ഞിട്ടും അനുവദിക്കാതെ വാഹനം ഉൾപ്പടെ റോഡിൽ തടഞ്ഞിട്ടശേഷം ഫൈൻ നൽകണമെന്ന് പൊലീസ് പറഞ്ഞെന്നായിരുന്നു പരാതി.