കണ്ണൂരിൽ തുരന്തോ എക്‌സ്പ്രസിന് നേരെ കല്ലേറ്; 24 മണിക്കൂറിനിടയിൽ നാലാമത്തെ സംഭവം
കണ്ണൂര്‍: കണ്ണൂരില്‍ തുരന്തോ എക്സ്പ്രസിനു നേരെ കല്ലേറ്. പാപ്പിനിശ്ശേരിക്കും വളപട്ടണത്തിനും ഇടയിലാണ് കല്ലേറുണ്ടായത്. തിങ്കളാഴ്ച ഉച്ചയ്ക്ക് 12 മണിയോടെയാണ് സംഭവം. കഴിഞ്ഞ 24 മണിക്കൂറിനുള്ളില്‍ നാലാമത്തെ ട്രെയിനിനു നേരെയാണ് കണ്ണൂര്‍, കാസർകോട് പ്രദേശങ്ങളിൽ വച്ച് കല്ലേറുണ്ടാകുന്നത്. ഞായറാഴ്ച രാത്രി മിനിറ്റുകള്‍ക്കിടയില്‍ മൂന്ന് ട്രെയിനുകള്‍ക്ക് നേരെ കല്ലേറുണ്ടായിരുന്നു. മംഗലാപുരം ഭാഗത്തേക്ക് പോകുകയായിരുന്ന നേത്രാവതി എക്‌സ്പ്രസ്, ചെന്നൈ-മംഗളൂരു എക്‌സ്പ്രസ്, എറണാകുളം-ഓഖ എക്‌സ്പ്രസ് എന്നീ ട്രെയിനുകൾക്ക് നേരെയാണ് കല്ലേറുണ്ടായത്. കല്ലേറുമായി ബന്ധപ്പെട്ട വിഷയത്തില്‍ റെയില്‍വേ പോലീസ് അന്വേഷണം ആരംഭിച്ചിട്ടുണ്ട്. പിന്നിൽ ആസൂത്രിതമായ നീക്കമാണോ എന്ന് പോലീസ് പരിശോധിക്കുന്നുണ്ട്. സംഭവവുമായി ബന്ധപ്പെട്ട് ചിലരെ ഇന്നലെ രാത്രി പോലീസ് കസ്റ്റഡിയിലെടുത്തിരുന്നെങ്കിലും ഇവർക്ക് അക്രമത്തിൽ പങ്കില്ലെന്നാണ് വിവരം.