പെരിയ ഇരട്ടക്കൊലപാതകം ;
സർക്കാർ നിലപാടിനെതിരെ കല്യോട്ട് അമ്മമാരുടെ പ്രതിരോധ സംഗമം
പെരിയാ ഇരട്ടക്കൊലപാതകകേസിൽ സിബിഐ അന്വേഷണം അട്ടിമറിക്കാൻ ശ്രമിക്കുന്ന സംസ്ഥാന സർക്കാർ നിലപാടിനെതിരെ ശരത് ലാലിന്റെ ജന്മദിനത്തിൽ മഹിളാ കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ കല്യോട്ട് അമ്മമാരുടെ പ്രതിരോധ സംഗമം നടത്തി . ഡിസിസി പ്രസിഡന്റ് ഹക്കീം കുന്നിൽ ഉദ്ഘാടനം ചെയ്തു . ഇരട്ടകൊലപാതക കേസിൽ സിപിഎമ്മിന്റെ ഉന്നത നേതാക്കളിലേക്ക് അന്വേഷണം എത്തുമെന്ന ഭയംമൂലമാണു സിബിഐ അന്വേഷണം അട്ടിമറിക്കാൻ കേരള സർക്കാർ സുപ്രീം കോടതിയെ സമീപിക്കുന്നതെന്ന് ഡിസിസി പ്രസിഡന്റ് ഹക്കീം കുന്നിൽ ആരോപിച്ചു . കൊലപാതകത്തിനെതിരെ ലോകസഭാ തിരഞ്ഞെടുപ്പിലുണ്ടായ ജനവിധിയും കോടതി വിധിയും ഒന്നും മാനിക്കില്ലെന്നതാണു സർക്കാർ നിലപാടെന്നും അദ്ദേഹം കുറ്റപ്പെടുത്തി . മഹിളാ കോൺഗ്രസ് ജില്ലാ വൈസ് പ്രസിഡന്റ് ശ്രീകല പുല്ലൂർ അധ്യക്ഷത വഹിച്ചു . കെപിസിസി സെകട്ടറി ബാലകൃഷ്ണൻ പെരിയ , ഡിസിസി ജനറൽ സെക്രട്ടറി ധന്യ സുരേഷ് , യൂത്ത് കോൺഗ്രസ് ജില്ലാ പ്രസിഡന്റ് ബി.പി. പ്രദീപ്കുമാർ , കൃപേഷിന്റേയും ശരത് ലാലിന്റെയും രക്ഷിതാക്കളായ പി.വി.കൃഷ്ണൻ ,പി.കെ.സത്യനാരായണൻ , യൂത്ത് കോൺഗ്രസ് പാർലമെന്റ് മണ്ഡലം മുൻ പ്രസിഡന്റ് സാജിദ് മവ്വൽ , പ്രവാസി കോൺഗ്രസ് ജില്ലാ പ്രസിഡന്റ് പത്മരാജൻ ഐങ്ങോത്ത് , സി.കെ.അരവിന്ദൻ , എം.കെ.ബാബുരാജ് , മഹിളാ കോൺഗ്രസ് നേതാക്കളായ സി.ശ്യാമള , പത്മിനി കൃഷ്ണൻ , തങ്കമണി സി . നായർ , ലത പനയാൽ , കെ.ഉമാവതി , സിന്ധു പത്മനാഭൻ , ഉഷ ആയമ്പാറ , ഇന്ദിര കൊടവലം , തമ്പായി കല്യോട്ട് എന്നിവർ പങ്കെടുത്തു . പുല്ലൂർ പെരിയ മണ്ഡലം കോൺഗ്രസ് കമ്മിറ്റിയെ അറിയിക്കാതെയാണു മഹിളാ കോൺഗ്രസ് കല്യോട്ട് പ്രതിരോധ സംഗമം നടത്തിയതെന്ന പരാതിയുമായി മണ്ഡലം പ്രസിഡന്റ് ടി.രാമകൃഷ്ണൻ രംഗത്തെത്തി . ഇക്കാര്യം ഡിസിസി പ്രസിഡന്റിന്റെ ശ്രദ്ധയിൽപ്പെടുത്തിയതായും അദ്ദേഹം പറഞ്ഞു . എന്നാൽ ഫോണിലൂടെ പറഞ്ഞു . എന്നാൽ ഫോണിലൂടെ മണ്ഡലം പ്രസിഡന്റിനെ പരിപാടിയെക്കുറിച്ച് അറിയിച്ചിരുന്നതായി മഹിളാ കോൺഗ്രസ് ജില്ലാ നേതൃത്വം അറിയിച്ചു