കണ്ണൂരിൽ മാതാവിന്റെ കൺമുന്നിൽ ടിപ്പർ ലോറിയിടിച്ച് അഞ്ചുവയസുകാരന് ദാരുണാന്ത്യം

ശ്രീകണ്ഠപുരം: സ്കൂൾബസിറങ്ങി മാതാവിനൊപ്പം വീട്ടിലേക്ക് നടന്നുപോവുകയായിരുന്ന അഞ്ചുവയസ്സുകാരന് ടിപ്പർ ലോറിടിച്ച് ദാരുണാന്ത്യം. മയ്യിൽ എൽ.പി. സ്കൂൾ യു.കെ.ജി. വിദ്യാർഥി മലപ്പട്ടം ചൂളിയാട് കടവിലെ മുഹമ്മദ് ത്വാഹ (അഞ്ച്) ആണ് മരിച്ചത്.
തിങ്കളാഴ്ച വൈകീട്ട് മൂന്നരയോടെ ചുളിയാട് കടവ് റോഡിലാണ് സംഭവം. സ്കൂൾ വിട്ട് ത്വാഹയും സഹോദരൻ മുഹമ്മദ് ഷാനും മാതാവ് ഷബാനക്കൊപ്പം നടന്നുപോകുകയായിരുന്നു. സമീപത്തെ കടയിലേക്ക് പോകാനായി പെട്ടെന്ന് റോഡ് മുറിച്ചുകടക്കാനുള്ള ശ്രമത്തിൽ മുഹമ്മദ് ത്വാഹ എതിരേവന്ന ലോറിക്കടിയിൽപ്പെടുകയായിരുന്നു.
ഉടൻ പരിയാരത്തെ കണ്ണൂർ ഗവ. മെഡിക്കൽ കോളേജ് ആസ്പത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം ഗവ. മെഡിക്കൽ കോളേജ് ആസ്പത്രി മോർച്ചറിയിൽ. പിതാവ്: ഷംസു കുളിയാൽ (ചേലേരി എക്കൈത്തോട്). മറ്റ് സഹോദരങ്ങൾ: സസ്ന (വിദ്യാർഥിനി, മയ്യിൽ ഗവ. ഹൈസ്കൂൾ), ഷാനു.