ജില്ലയിൽ വീണ്ടും മണൽ വേട്ട ; 12 ലോഡ് മണൽ പിടിച്ചെടുത്തു

കുമ്പള: രണ്ടു വ്യത്യസ്ത സംഭവങ്ങളിലായി പോലീസും റവന്യൂ അധികൃതരും 12 ലോഡ് മണൽ പിടിച്ചു. ഷിറിയ പുഴയോരത്ത് ഒളയത്ത് കൂട്ടിയിട്ടിരുന്ന 10 ലോഡ്‌ മണൽ മഞ്ചേശ്വരം തഹസിൽദാറുടെ നിർദേശപ്രകാരം ഇച്ചിലങ്കോട് സ്പെഷ്യൽ വില്ലേജ് ഓഫീസർ രാജുവിന്റെ നേതൃത്വത്തിൽ റവന്യൂ സംഘം പിടിച്ചെടുക്കുകയായിരുന്നു. കുമ്പള പോലീസും സ്ഥലത്തെത്തിയിരുന്നു. കഴിഞ്ഞ ദിവസം അംഗഡിമുഗറിൽവെച്ചാണ് രണ്ടുലോറി മണൽ കുമ്പള എസ്.ഐ. എ.സന്തോഷ് കുമാർ പിടിച്ചെടുത്തത്. ഷിറിയയിൽനിന്ന്‌ പിടിച്ചെടുത്ത മണൽ ഇച്ചിലങ്കോട് വില്ലേജ് ഓഫീസ് പരിസരത്തേക്ക് മാറ്റി.