മെഡിക്കല്‍ കോളജുകളില്‍ ഐഡി കാര്‍ഡ് കർശനം; നിർദേശവുമായി ആരോഗ്യമന്ത്രി
തിരുവനന്തപുരം∙ മെഡിക്കല്‍ കോളജുകളില്‍ തിരിച്ചറിയല്‍ കാര്‍ഡ് പരിശോധന കര്‍ശനമാക്കാന്‍ ആരോഗ്യമന്ത്രിയുടെ നിര്‍ദേശം. തിരുവനന്തപുരത്ത് വ്യാജ ഡോക്ടറെ പിടികൂടിയ സാഹചര്യത്തിലാണ് നടപടി.
പൂന്തുറ സ്വദേശി നിഖിൽ എന്ന യുവാവ് ആണ് പിജി ഡോക്ടർ എന്ന വ്യാജേന തിരുവനന്തപുരം മെഡിക്കൽ കോളജിൽ ചികിത്സ നടത്തിയത്. രോഗിയുടെ രക്ത സാമ്പിളിൽ വെള്ളം ചേർക്കുകയും മുട്ടുവേദനയ്ക്ക് ചികിത്സ തേടിയെത്തിയാളെ ഗുരുതര രോഗമാണെന്ന് തെറ്റിദ്ധരിപ്പിച്ച് പണം തട്ടുകയും ചെയ്തു. ഡോക്ടർമാർ ചേർന്നാണ് ഇയാളെ പിടികൂടിയത്. ഇതോടെയാണ് മെഡിക്കല്‍ കോളജുകളിൽ തിരിച്ചറിയൽ കാർഡ് നിർബന്ധമാക്കാൻ ആരോഗ്യമന്ത്രി വീണാ ജോർജ് കർശന നിർദേശം നൽകിയത്.
രോഗികളുടെ കൂട്ടിരുപ്പുകാരായി ഒരാളെ മാത്രമേ അനുവദിക്കുകയുള്ളൂ. ഡോക്ടറുടെ നിർദേശം അനുസരിച്ച് മാത്രമേ മറ്റൊരാൾക്ക് കൂടി അനുമതി ലഭിക്കൂ. ജീവനക്കാരും വിദ്യാർഥികളും നിർബന്ധമായും ഐഡി കാർഡ് ധരിക്കണം. സുരക്ഷാ ജീവനക്കാർ ഐഡി കാർഡ് പരിശോധിച്ച് വ്യാജമല്ലെന്ന് ഉറപ്പുവരുത്തണം. പൊതുജനങ്ങളും ജീവനക്കാരും നിർദേശങ്ങളോട് സഹകരിക്കണമെന്ന് മന്ത്രി ആവശ്യപ്പെട്ടു.