ലോക്ക് ഡൗണ് നിയന്ത്രണങ്ങളില് ഇന്ന് മുതല് കൂടുതല് ഇളവുകള്
സര്ക്കാര് ഓഫീസുകളില് മുഴുവന് ജീവനക്കാരും ഹാജരാകണമെന്ന് പുതിയ ഉത്തരവ് നിര്ദേശിക്കുന്നു.
തിരുവനന്തപുരം: സംസ്ഥാനത്ത് ലോക്ക് ഡൗണ് നിയന്ത്രണങ്ങളില് ഇന്ന് മുതല് കൂടുതല് ഇളവുകള്. സര്ക്കാര് ഓഫീസുകളില് മുഴുവന് ജീവനക്കാരും ഹാജരാകണമെന്ന് പുതിയ ഉത്തരവ് നിര്ദേശിക്കുന്നു. കൊവിഡ് മാനദണ്ഡം പാലിച്ചാകണം ഓഫീസുകള് പ്രവര്ത്തിക്കേണ്ടത്. ഇതു സംബന്ധിച്ച ഉത്തരവ് ദുരന്ത നിവാരണ അതോറിട്ടി ചൊവ്വാഴ്ച പുറത്തിറക്കി. സര്ക്കാര് ഓഫീസുകളിലെ ഹാജര് നില നൂറുശതമാനമാക്കാനാണ് തീരുമാനം.
സര്ക്കാര് ഓഫീസുകള്ക്ക് പുറമെ പൊതുമേഖലാ സ്ഥാപനങ്ങളിലും ഹാജര് നില 100 ശതമാനമായി പുനസ്ഥാപിക്കും. കോവിഡ് മാനദണ്ഡങ്ങള് കര്ശനമായി പാലിച്ചുകൊണ്ടാണ് സര്ക്കാര് ഓഫീസുകളും, പൊതുമേഖലാ സ്ഥാപനങ്ങളും പൂര്ണതോതില് പ്രവര്ത്തിക്കേണ്ടതെന്നും ദുരന്ത നിവാരണ വകുപ്പിന്റെ ഉത്തരവില് പറയുന്നു.കോവിഡ് നിയന്ത്രണങ്ങള് സര്ക്കാര് ഓഫീസുകളുടെ പ്രവര്ത്തനത്തെ ബാധിച്ചതായി ശ്രദ്ധയില്പെട്ടിട്ടുണ്ടെന്നും ഉത്തരവില് പറയുന്നു.
അന്യസംസ്ഥാനങ്ങളില് നിന്നെത്തുന്നവര്ക്കുള്ള 14 ദിവസത്തെ ക്വറന്റീന് ഏഴ് ദിവസമായി കുറച്ചിട്ടുണ്ട്. ഏഴ് ദിവസത്തിന് ശേഷം കോവിഡ് ടെസ്റ്റ് നടത്തി നെഗറ്റീവായാല് ക്വാറന്്റീന് തുടരേണ്ട. അതേസമയം ആരോഗ്യപ്രോട്ടോക്കോള് പ്രകാരം 14 ദിവസത്തെ ക്വറന്റീന് പൂര്ത്തിയാക്കണമെന്നും ഉത്തരവിലുണ്ട്. ചികിത്സ ഉള്പ്പെടെയുള്ള ആവശ്യങ്ങള്ക്ക് കേരളത്തിലെത്തുന്നവര്ക്ക് 14 ദിവസത്തെ നിര്ബന്ധിത ക്വറന്റീന് ബുദ്ധിമൂട്ടുണ്ടാക്കുന്നെന്ന പരാതിയുടെ അടിസ്ഥാനത്തിലാണ് ഇളവ് പ്രഖ്യാപിച്ചത്. ഹോട്ടലുകളിളും റസ്റ്റോറന്്റുകളിലും കോവിഡ് പ്രോട്ടോക്കോള് പാലിച്ച് ഇരുന്ന് ഭക്ഷണം കഴിക്കാനും അനുമതിയുണ്ട്. കോവിഡ് നിയന്ത്രണങ്ങളുടെ ഭാഗമായി ഹോട്ടലുകളില് നിന്ന് ഭക്ഷണം പാഴ്സല് വാങ്ങുന്നതിന് മാത്രമായിരുന്നു നേരത്തേ അനുമതി ഉണ്ടായിരുന്നത്.