പുലിയിറങ്ങിയെന്ന് അഭ്യൂഹം ; തിരഞ്ഞിറങ്ങിയവർക്ക് പകരം കാട്ടു പൂച്ച ; പരിഭ്രാന്തരായി നാട്ടുകാർ
കൊടുങ്ങല്ലൂര്‍ : പുലിയെ തിരഞ്ഞിറങ്ങിയവര്‍ക്ക് മുന്നില്‍ ചാടിവീണത് കാട്ടുപൂച്ച. ഇത് ജനക്കൂട്ടത്തിനിടയില്‍ ചാടി ഇറങ്ങിയോടിയതോടെ കാട്ടുപൂച്ചയെ കണ്ട് നാട്ടുകാരും പരിഭ്രാന്തരാവുകയായിരുന്നു. വെള്ളിയാഴ്ച രാവിലെ പത്തരയോടെയാണ്‌ പുല്ലൂറ്റ് പന്തലാലുക്കല്‍ ക്ഷേത്രത്തിന് പടിഞ്ഞാറ്‌ പുഴയോടുചേര്‍ന്ന് കാടും ചെളിയും നിറഞ്ഞ ഭാഗത്ത് പുലിയെ കണ്ടുവെന്ന വാര്‍ത്ത ഉണ്ടായത്. അതേസമയം കോഴിക്കട ഭാഗത്ത് ഒരുവീടിന് മുന്നില്‍ അജ്ഞാത ജീവിയുടെ കാല്‍പ്പാടുകളും കണ്ടെത്തുകയുണ്ടായി.
ഇവിടെ കെട്ടിടംപണിക്കെത്തിയ തൊഴിലാളിയാണ് കാടിനിടയിലെ മതിലില്‍ പുലിയെ കണ്ടതായി അറിയിക്കുന്നത്. ജോലിക്കിടയില്‍ പുറത്തേക്ക് വന്ന ഇയാള്‍ പുലിയെ കണ്ടയുടനെ കെട്ടിടത്തിലേക്ക് ഓടിക്കയറുകയും ചെയ്തു എന്നാണ് പറയുന്നത്. വിവരം പുറത്തറിഞ്ഞതോടെ നൂറുകണക്കിന് നാട്ടുകാരാണ് സംഭവസ്ഥലത്ത് പരിശോധനയ്ക്ക് എത്തിയത്.
അതോടൊപ്പം വി.ആര്‍. സുനില്‍കുമാര്‍ എം.എല്‍.എ.യും വാര്‍ഡ് കൗണ്‍സിലര്‍ കവിതാ മധുവും മറ്റും സ്ഥലത്തെത്തുകയുണ്ടായി. പുലിയെ കാണാത്തതിനെത്തുടര്‍ന്ന് ഈ ഭാഗത്തെ കുറ്റിക്കാടുകള്‍ വൃത്തിയാക്കാന്‍ ആവശ്യപ്പെട്ട് എം.എല്‍.എ. മടങ്ങുകയാണ് ഉണ്ടായത്. ജെ.സി.ബി. കൊണ്ടുവന്ന് കാട് വൃത്തിയാക്കാന്‍ തുടങ്ങിയപ്പോള്‍ മൂന്നടിയോളം വലുപ്പമുള്ള തവിട്ടുനിറത്തിലുള്ള കാട്ടുപൂച്ച നാട്ടുകാര്‍ക്കിടയിലൂടെ രക്ഷപ്പെട്ട് ഓടുകയായിരുന്നു. എന്നാല്‍, താന്‍ കണ്ടത് പുലിതന്നെയാണെന്ന ഉറച്ച നിലപാടിലാണ് തൊഴിലാളി ഉള്ളത്. പ്രദേശമാകെ അരിച്ചുപെറുക്കി പരിശോധിച്ചിട്ടും മറ്റൊന്നിനെയും കണ്ടത്താന്‍ നാട്ടുകാര്‍ക്ക് സാധിച്ചില്ല. കോഴിക്കടയിലെ പ്രിയകുമാര്‍ എന്നയാളുടെ വീടിന് മുന്നില്‍ കണ്ടെത്തിയ കാല്‍പ്പാടുകള്‍ വിദഗ്ധപരിശോധനയ്ക്കായി വനംവകുപ്പിന് കൈമാറിയിരിക്കുകയാണ്.