“ചങ്കിൽ വീണ കുരുക്ക് മുറുകുന്നു” ; ശിവശങ്കറും ചാര്‍ട്ടേഡ് അക്കൗണ്ടന്റും തമ്മിലുള്ള വാട്ട്സാപ്പ് സന്ദേശങ്ങള്‍ പുറത്ത്
കൊച്ചി: മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം.ശിവശങ്കറിന്റെയും ചാർട്ടേഡ് അക്കൗണ്ടന്റ് വേണുഗോപാലിന്റെയും വാട്ട്സാപ്പ് സന്ദേശങ്ങൾ പുറത്ത്. സ്വപ്ന അറസ്റ്റിലായി പത്തുദിവസത്തിനു ശേഷമുള്ള വാട്ട്സാപ്പ് സന്ദേശങ്ങളിൽ ലോക്കർ സംബന്ധിച്ച ആശങ്കകളാണ് പ്രധാനമായും പങ്കുവെക്കുന്നത്. മാധ്യമങ്ങളിൽനിന്ന് രക്ഷപ്പെടാൻ വേണുഗോപാലിനോട് കേരളം വിട്ടു പോകാനും ശിവശങ്കർ ഉപദേശിക്കുന്നുണ്ട്. ജൂലൈ 11നാണ് സ്വപ്ന സുരേഷിനെ എൻ.ഐ.എ. അറസ്റ്റ് ചെയ്തത്. ഇതിനു പത്തുദിവസത്തിനു ശേഷം ശിവശങ്കറും വേണുഗോപാലും തമ്മിലുള്ള വാട്ട്സ് ആപ്പ് സന്ദേശങ്ങളുടെ പകർപ്പ് മാതൃഭൂമി ന്യൂസിനു ലഭിച്ചു. സ്വപ്നയുടെയും വേണുഗോപാലിന്റെയും സംയുക്ത ലോക്കർ സംബന്ധിച്ച വിവരങ്ങൾ ഈ ഘട്ടത്തിൽ പുറത്തുവന്നിരുന്നു. ഇതു സംബന്ധിച്ച് ശിവശങ്കറും വേണുഗോപാലും വാട്ട്സ് ആപ്പിലൂടെ സംസാരിക്കുന്നുണ്ട്.
ലോക്കറിനെ കുറിച്ചാണ് കസ്റ്റംസ് തന്നോട് ചോദിച്ചതെന്ന് വേണുഗോപാൽ ശിവശങ്കറിനെ അറിയിക്കുന്നുണ്ട്. താൻ ആവശ്യപ്പെട്ടിട്ടാണ് സ്വപ്ന സുരേഷിനൊപ്പം ലോക്കർ തുറന്നതെന്ന് വേണുഗോപാലിന്റെ മൊഴി പുറത്തുവന്ന മാധ്യമവാർത്തകളും ഈ ദിവസങ്ങളിൽ ശിവശങ്കർ പങ്കുവെക്കുന്നു.
ഒരു ഘട്ടത്തിൽ മാധ്യമങ്ങളിൽനിന്ന് രക്ഷപ്പെടാൻ കേരളം വിട്ടുപോകാൻ വേണുഗോപാലിനെ ശിവശങ്കർ ഉപദേശിക്കുന്നുണ്ട്. അന്വേഷണ ഏജൻസികൾ തന്റെ സാമ്പത്തിക ഇടപാടുകൾ സംബന്ധിച്ച് അന്വേഷണം ആരംഭിച്ചതായി ശിവശങ്കറിന് സൂചന ലഭിച്ചിരുന്നതായും വാട്ട്സ് ആപ്പ് സന്ദേശങ്ങളിൽനിന്ന് വ്യക്തമാണ്. എം. ശിവശങ്കറിന്റെ ജാമ്യാപേക്ഷയെ എതിർക്കാൻ അന്വേഷണ ഏജൻസികൾ പ്രധാനമായും ആയുധമാക്കുന്നത് വാട്ട്സ് ആപ്പ് സന്ദേശങ്ങളാണ്. ആ വാട്ട്സ് ആപ്പ് സന്ദേശങ്ങളിൽ ചിലതു മാത്രമാണ് ഇപ്പോൾ പുറത്തുവന്നിരിക്കുന്നത്. സ്വപ്ന സുരേഷും വേണുഗോപാലും സംയുക്തമായി ലോക്കർ തുറന്നിരുന്നുവെന്നും അതിൽനിന്ന് ലൈഫ് ഇടപാടുമായി ബന്ധപ്പെട്ടതും സ്വർണക്കടത്തുമായി ബന്ധപ്പെട്ടതുമായ പണം കണ്ടെത്തിയതുമായ വാർത്തകൾ നേരത്തെ തന്നെ പുറത്തെത്തിയിരുന്നു. മാധ്യമങ്ങൾ തന്റെ വീടിനു മുന്നിലെത്തിയപ്പോൾ താൻ വീട് അടച്ചു. വീടിന് പുറത്തിറങ്ങിയില്ലെന്നും അവരുടെ ഫോൺ എടുത്തില്ലെന്നും വേണുഗോപാൽ ശിവശങ്കറിനെ അറിയിക്കുന്നുണ്ട്. ഈ ഘട്ടത്തിലാണ് ആവശ്യമെങ്കിൽ ഇവിടെനിന്ന് മാറി നിൽക്കണമെന്ന് വേണുഗോപാലിനോട് ശിവശങ്കർ നിർദേശിക്കുന്നത്. നാഗർകോവിൽ അടക്കമുള്ള സ്ഥലങ്ങളിലേക്ക് താങ്കൾക്ക് പോകാവുന്നതാണെന്നും ശിവശങ്കർ വേണുഗോപാലിനോട് പറയുന്നുണ്ട്.