ബെണ്ടിച്ചാലില് നിന്നു കാണാതായ യുവാവിന്റെ മൃതദേഹം ചന്ദ്രഗിരി പുഴയില്
കാസർകോട്: ചട്ടഞ്ചാൽ, ബെണ്ടിച്ചാലിൽ നിന്നു കാണാതായ യുവാവിൻ്റെ മൃതദേഹം ചന്ദ്രഗിരിപുഴയില തളങ്കര പാലത്തിനു സമീപത്തു കണ്ടെത്തി. എയ്യളയിലെ പരേതനായ അബ്ദുള്ളക്കുഞ്ഞിയുടെ മകൻ നിസാറി (47)ന്റെ മൃതദേഹമാണ് ഞായറാഴ്ച രാത്രി 10 മണിയോടെ പുഴയിൽ കണ്ടെത്തിയത്. പൊലീസും നാട്ടുകാരും ചേർന്ന് മൃതദേഹം കരയ്ക്കെടുത്ത് ജനറൽ ആശുപത്രി മോർച്ചറിയിലേയ്ക്ക് മാറ്റി. ശനിയാഴ്ച ഉച്ചയ്ക്ക് ഭക്ഷണം കഴിച്ച ശേഷം വീട്ടിൽ നിന്നു പുറത്തേയ്ക്ക് പോയതായിരുന്നു നിസാർ.
തിരിച്ചു വരാത്തതിനെ തുടർന്ന് സഹോദരി ഭർത്താവായ അബ്ദുൽ ഖാദർ മേൽപ്പറമ്പ് പൊലീസിൽ പരാതി നൽകി. പൊലീസ് കേസെടുത്ത് അന്വേഷിക്കുന്നതിനിടയിലാണ് മൃതദേഹം ചന്ദ്രഗിരി പുഴയിൽ കണ്ടെത്തിയത്. നിർമ്മാണ തൊഴിലാളിയായിരുന്നു നിസാർ. മാതാവ്: റുഖിയ. ഭാര്യ: ആമിന. മക്കൾ: മറ്വാൻ, ലദീബ്, സിനാൻ, ഫിദ. സഹോദരങ്ങൾ: മുഹമ്മദ് കുഞ്ഞി, ഹസൈനാർ, പരേതയായ ആയിഷ.