മന്ത്രി വീണാ ജോര്ജിന്റെ ആരോഗ്യസ്ഥിതി; പുതിയ മെഡിക്കല് ബുള്ളറ്റിൻ പുറത്ത്, ‘വേദനയ്ക്ക് ആശ്വാസം, അടിയന്തര ശസ്ത്രക്രിയ വേണ്ട’
കണ്ണൂര്: കണ്ണൂർ റെയില്വേ സ്റ്റേഷനില് വെച്ച് കെഎസ്യു പ്രവർത്തകരുടെ പ്രതിഷേധത്തിനിടയില് പരിക്കേറ്റ് ചികിത്സയില് കഴിയുന്ന ആരോഗ്യമന്ത്രി വീണാ ജോര്ജിന് കടുത്ത വേദനയ്ക്ക് ആശ്വാസമെന്ന് പുതിയ മെഡിക്കല് ബുള്ളറ്റിൻ പുറത്തുവന്നു.
മന്ത്രിക്ക് കടുത്ത വേദനയ്ക്ക് ആശ്വാസമുണ്ടെന്നും അടിയന്തര ശസ്ത്രക്രിയ വേണ്ടതില്ലെന്നുമാണ് ഡോക്ടര്മാര് അറിയിക്കുന്നത്. രക്തസമ്മർദ്ദം മരുന്നുകളാല് നിയന്ത്രണവിധേയമാണ്. കഴുത്തിലെ കശേരുക്കളില് ഉണ്ടായ സമ്മർദ്ദമാണ് വേദനയ്ക്ക് കാരണം.യാത്ര അനുവദിക്കാൻ ആകാത്തത് കൊണ്ട് പരിയാരം മെഡിക്കല് കോളേജില് ചികിത്സയില് തുടരുമെന്നും മെഡിക്കല് ബുള്ളറ്റിൻ വ്യക്തമാക്കുന്നു.
ഇന്നലെ വൈകിട്ട് മൂന്നരയോടെയാണ് കണ്ണൂർ റെയില്വേ സ്റ്റേഷനില് കെഎസ്യു വീണാ ജോർജിനെതിരെ കെഎസ്യു പ്രവർത്തകരുടെ പ്രതിഷേധം ഉണ്ടായത്. വന്ദേഭാരത് ട്രെയിനില് തിരുവനന്തപുരത്തേക്ക് മടങ്ങാനെത്തിയ മന്ത്രി വീണാ ജോർജിനെ പ്ലാറ്റ്ഫോമില് എത്തിയ കെഎസ്യു പ്രവർത്തകർ കരിങ്കൊടി കാണിക്കുകയായിരുന്നു. പൊലീസ് വലയം ഭേദിച്ചാണ് പ്രവർത്തകർ മന്ത്രിയെ കരിങ്കൊടി കാണിച്ചത്. മന്ത്രി തിരിഞ്ഞ് നിന്ന് യൂത്ത് കോണ്ഗ്രസുകാരോട് രൂക്ഷമായി പ്രതികരിച്ചപ്പോള് പൊലീസ് പിടിച്ചുമാറ്റി. പ്രതിഷേധക്കാര് അതിക്രമിച്ചെത്തിയപ്പോള് കഴുത്തിന് പരിക്കെന്ന് വ്യക്തമാക്കിയ മന്ത്രി അല്പസമയം പ്ലാറ്റ്ഫോമില് ഇരുന്നു. പിന്നീട് മന്ത്രിയെ കണ്ണൂർ ജില്ലാ ആശുപത്രിയിലേക്കും തുടർന്ന് പരിയാരം മെഡിക്കല് കോളേജിലേക്കും മാറ്റി. വീണാ ജോർജിന്റെ കഴുത്തിന് ക്ഷതം ഉണ്ടെന്നാണ് ഡോക്ടർമാർ അറിയിച്ചത്.
അതിനിടെ, മന്ത്രി വീണാ ജോർജിനെ കെഎസ്യുക്കാർ ആക്രമിച്ചു എന്ന പരാതി തെളിയിക്കാൻ, സിപിഎം പുറത്തുവിട്ട ദൃശ്യങ്ങള് പൊളിഞ്ഞു. ആരോഗ്യമന്ത്രിയുടെ ഗണ്മാന്റെ വസ്ത്രമാണ് മന്ത്രിയുടെ കഴുത്തുവരെ എത്തിയ കരിങ്കൊടി എന്ന പേരില് പ്രചരിപ്പിച്ചത്. ആടിനെ പട്ടിയാക്കുന്ന പ്രചാരണമാണ് സിപിഎമ്മിന്റെതെന്ന് പ്രതിപക്ഷ നേതാവ് കുറ്റപ്പെടുത്തി. കലാപത്തിനുള്ള ഗൂഢാലോചന ആരോപിച്ച് സ്പീക്കർക്കെതിരെ യൂത്ത് കോണ്ഗ്രസ് ഡിജിപിക്ക് പരാതി നല്കി.