ഇന്ത്യ റഷ്യൻ എണ്ണ വാങ്ങുന്നത് പൂര്‍ണമായും നിര്‍ത്തും: ട്രംപ് ആവര്‍ത്തിക്കുന്നതിനിടെ ആശങ്ക മാറാതെ റിലയൻസ് അടക്കമുള്ള കമ്പനികള്‍
ദില്ലി: റഷ്യയില്‍ നിന്നുള്ള എണ്ണ ഇറക്കുമതി പൂർണ്ണമായും നിർത്തുമെന്ന് ഇന്ത്യ ഉറപ്പുനല്‍കിയെന്ന യുഎസ് പ്രസിഡൻ്റ് ഡൊണാള്‍ഡ് ട്രംപിൻ്റെ ആവർത്തിച്ചുള്ള പ്രസ്താവന ഇന്ത്യൻ എണ്ണക്കമ്ബനികളെ കടുത്ത പ്രതിസന്ധിയിലാക്കുന്നു.
റിലയൻസ് ഉള്‍പ്പെടെയുള്ള പ്രമുഖ കമ്ബനികള്‍ ഈ വിഷയത്തില്‍ കേന്ദ്രസർക്കാരിൻ്റെ നിലപാട് തേടി. ആസിയാൻ ഉച്ചകോടിയില്‍ പങ്കെടുക്കാൻ മലേഷ്യയിലേക്കുള്ള യാത്രാമധ്യേയാണ് പ്രസിഡൻ്റ് ഡൊണാള്‍ഡ് ട്രംപ് മാധ്യമങ്ങളോട് വീണ്ടും ഈ നിർണായക പരാമർശം നടത്തിയത്.
“റഷ്യയില്‍ നിന്ന് എണ്ണ വാങ്ങുന്നത് പൂർണ്ണമായി നിർത്തുമെന്ന് ഇന്ത്യ ഉറപ്പു നല്‍കിയിട്ടുണ്ട്” എന്ന് ട്രംപ് പറഞ്ഞു. ഇന്ത്യയും പാകിസ്ഥാനും തമ്മിലുള്ള യുദ്ധം താനാണ് അവസാനിപ്പിച്ചതെന്ന മുൻ അവകാശവാദവും അദ്ദേഹം ഈ വേളയില്‍ ആവർത്തിച്ചു. ട്രംപിന്റെ ഈ പ്രസ്താവന ഇന്ത്യയുടെ വിദേശനയത്തെ സംബന്ധിച്ച്‌ വലിയ ചോദ്യങ്ങള്‍ ഉയർത്തിയിരിക്കുകയാണ്. ട്രംപിന്റെ പ്രസ്താവന കണക്കിലെടുത്ത് വിമര്‍ശനവുമായി കോണ്‍ഗ്രസും രംഗത്തെത്തിയിട്ടുണ്ട്.
ഇന്ത്യൻ കമ്ബനികളുടെ ആശങ്ക
റഷ്യൻ എണ്ണക്കമ്ബനികളായ റോസ്നെഫ്റ്റ്, ലൂക്കോയില്‍ എന്നിവയ്ക്ക് അമേരിക്ക ഉപരോധം ഏർപ്പെടുത്തിയ സാഹചര്യമാണ് ഇന്ത്യൻ കമ്ബനികളുടെ ആശങ്കയ്ക്ക് കാരണം. ഈ ഉപരോധം നിലനില്‍ക്കെ റഷ്യയില്‍ നിന്ന് എണ്ണ വാങ്ങുന്നത് തുടർന്നാല്‍, റിലയൻസ് ഉള്‍പ്പെടെയുള്ള ഇന്ത്യൻ കമ്ബനികള്‍ക്കും അമേരിക്കൻ ഉപരോധം നേരിടേണ്ടി വരുമെന്നാണ് നിലവിലെ അവസ്ഥ. റഷ്യയില്‍ നിന്നുള്ള എണ്ണ ഇറക്കുമതിയുടെ കാര്യത്തില്‍ എന്ത് തീരുമാനമാണ് സർക്കാർ എടുത്തിട്ടുള്ളതെന്ന കാര്യത്തില്‍ നിലപാട് വ്യക്തമാക്കണമെന്നാണ് എണ്ണ കമ്ബനികളുടെ അസോസിയേഷൻ കേന്ദ്ര സർക്കാരിനോട് അഭ്യർത്ഥിച്ചിരിക്കുന്നത്. അമേരിക്കൻ സമ്മർദ്ദത്തിന് വഴങ്ങില്ലെന്നതാണ് പൊതുവെ റഷ്യൻ എണ്ണ ഇറക്കുമതിയുടെ കാര്യത്തില്‍ ഇന്ത്യയുടെ നയം. എന്നാല്‍, ട്രംപിൻ്റെ പുതിയ പ്രസ്താവന ഈ വിഷയത്തില്‍ ഒരു അനിശ്ചിതാവസ്ഥ സൃഷ്ടിച്ചിരിക്കുകയാണ്.
ആസിയാൻ ഉച്ചകോടിയില്‍ ഇന്ത്യയുടെ നിലപാട്
അതിനിടെ, മലേഷ്യയില്‍ നടക്കുന്ന ഇന്ത്യ-ആസിയാൻ ഉച്ചകോടിയില്‍ പ്രധാനമന്ത്രി നരേന്ദ്ര മോദി ഓണ്‍ലൈനായി സംസാരിച്ചു. എല്ലാവരെയും ഉള്‍ക്കൊള്ളുന്ന നയമാണ് ഇന്ത്യയും ആസിയാനും പിന്തുടരുന്നതെന്ന് അദ്ദേഹം വ്യക്തമാക്കി. അമേരിക്കയുമായി തീരുവ തർക്കം തുടരുന്ന പശ്ചാത്തലത്തില്‍ തന്നെ, വ്യാപാര രംഗത്ത് ആസിയാനുമായുള്ള സഹകരണം ശക്തമാക്കുമെന്നും മോദി അറിയിച്ചു. വിദേശകാര്യമന്ത്രി എസ്. ജയശങ്കർ ഉച്ചകോടിയില്‍ നേരിട്ട് പങ്കെടുത്തു. നാളെയും പ്രധാനമന്ത്രി ഓണ്‍ലൈനായി ആസിയാൻ ഉച്ചകോടിയില്‍ സംസാരിക്കും. റഷ്യൻ എണ്ണയുടെ കാര്യത്തില്‍ സർക്കാർ സ്വീകരിക്കുന്ന അന്തിമ നിലപാട് എന്തായിരിക്കും എന്നതിനെ ആശ്രയിച്ചായിരിക്കും ഇന്ത്യൻ എണ്ണക്കമ്ബനികളുടെ ഭാവി നീക്കങ്ങള്‍. അതേസമയം, ട്രംപിൻ്റെ പ്രസ്താവനയുടെ നിജസ്ഥിതി എത്രയും പെട്ടെന്ന് കേന്ദ്രസർക്കാർ വ്യക്തമാക്കേണ്ടത് അത്യാവശ്യമാണെന്നാണ് കോണ്‍ഗ്രസ് ആവശ്യപ്പെടുന്നത്.