തിരഞ്ഞെടുപ്പിൽ വിജയിക്കാൻ പ്രവർത്തകർ നേർന്നു: വി.ഡി.സതീശന് ഉണ്ണിയപ്പം കൊണ്ട് തുലാഭാരം

ചവറ (കൊല്ലം): പ്രതിപക്ഷ നേതാവ് വി.ഡി.സതീശൻ പന്മന സുബ്രഹ്‌ണ്യ ക്ഷേത്രത്തിൽ തുലാഭാരം നടത്തി. കൊട്ടാരക്കര ഗണപതി ക്ഷേത്രത്തില ഉണ്ണിയപ്പം കൊണ്ടായിരുന്നു തുലാഭാരം. കഴിഞ്ഞ നിയമസഭാ തിരഞ്ഞെടുപ്പിൽ വിജയിക്കാനായി പന്മനയിലെ കോൺഗ്രസ് പ്രവർത്തകർ സതീശന് പന്മന സുബ്രഹ്‌മണ്യ സന്നിധിയിൽ തുലാഭാരം നടത്താമെന്ന് നേർന്നിരുന്നു. 

ഇന്ന് ഉച്ചയ്ക്ക് ഒന്നേകാലോടെ ക്ഷേത്രത്തിൽ എത്തിയ സതീശൻ ദർശനത്തിനു ശേഷമാണ് തുലാഭാരം നടത്തിയത്. കൊട്ടാരക്കര ക്ഷേത്രത്തിൽ ഉണ്ണിയപ്പമുണ്ടാക്കുന്ന ജീവനക്കാർ പന്മന ക്ഷേത്രത്തിലെത്തിയാണ് തുലാഭാരത്തിനുവേണ്ട ഉണ്ണിയപ്പം തയ്യാറാക്കിയത്. എണ്ണായിരത്തിലധികം ഉണ്ണിയപ്പം വേണ്ടിവന്നു.  കോൺഗ്രസ് നേതാക്കൾ ഉൾപ്പെടെ നിരവധിപേർ ചടങ്ങിനു സാക്ഷികളായി.