കാസർഗോഡ് ജില്ലയിൽ കോവിഡ് ബോധവല്‍ക്കരണം ഊര്‍ജ്ജിതപ്പടുത്തി ആരോഗ്യ വകുപ്പ്

കാഞ്ഞങ്ങാട് ∙ ജില്ലയില്‍ അതിതീവ്ര വ്യാപന ശേഷിയുള്ളതും ജനിതക വ്യതിയാനം വന്നതുമായ 3 കൊറോണ വൈറസ് വകഭേദം റിപ്പോര്‍ട്ട് ചെയ്തു. സൗത്ത് ആഫ്രിക്കയിലെ മാരക ശേഷിയുള്ള വൈറസ് വകഭേദം (B1.35), രോഗപ്രതിരോധ ശേഷിയെ പോലും മറികടക്കുന്ന, മഹാരാഷ്ട്രയിൽ കണ്ടെത്തിയ ഇരട്ട വ്യതിയാനം സംഭവിച്ച വൈറസ് (B1.617), യുകെ വകഭേദം എന്നിവയാണ് ജില്ലയിൽ റിപ്പോര്‍ട്ട് ചെയ്തത്. നിലവിൽ ജില്ലയിൽ കൂടുതൽ പേരിൽ കണ്ടെത്തിയത് ബ്രിട്ടൻ (യുകെ-B117) വകഭേദമാണ്.

ഇതിന് പുറമേ മാരക ശേഷിയുള്ള ദക്ഷിണാഫ്രിക്കൻ വകഭേദവും മഹാരാഷ്ട്ര വകഭേദവും ജില്ലയിൽ റിപ്പോര്‍ട്ട് ചെയ്തതോടെ ആരോഗ്യ വകുപ്പ് അതീവ ജാഗ്രതയിലാണ്. അതീവവ്യാപന ശേഷിയുള്ളതും തീവ്രതയുള്ളതുമായ വൈറസ് വകഭേദമാണ് ഇവ രണ്ടും. അതിനാൽ രണ്ടു ഡോസ് വാക്സീൻ എടുത്തവർ പോലും മാസ്ക് അണിയുന്നതില്‍ അടക്കം വീഴ്ച കാണിക്കരുതെന്ന് ആരോഗ്യവകുപ്പ് അറിയിച്ചു.

ജനിതക മാറ്റം വന്ന വൈറസ് മൂലം പോസിറ്റീവാകുന്നവർക്ക് ഐസിയു കെയര്‍ ചികിത്സ അടക്കം വേണ്ടി വരും. മഹാരാഷ്ട്ര വകഭേദം ജില്ലയിൽ പടർന്നാൽ സ്ഥിതി അതീവ ഗുരുതരമാകും. കൂടുതൽ ഓക്സിജൻ കിടക്കകൾ ഒരുക്കേണ്ടി വരും. സ്വകാര്യ മേഖലയിൽ പോലും മികച്ച ആശുപത്രി ഇല്ലാത്ത ജില്ലയിൽ രോഗവ്യാപനം സ്ഥിതി വഷളാക്കും.

ഡോ. എ.വി.രാംദാസ് (ജില്ലാ മെഡിക്കൽ ഓഫിസർ)

3 തരത്തിലുള്ള വൈറസ് വകഭേദം ജില്ലയിൽ റിപ്പോർട്ട് ചെയ്തിട്ടുണ്ട്. നിലവിൽ യുകെ വകഭേദമാണ് കൂടുതൽ. ദക്ഷിണാഫ്രിക്കൻ, മഹാരാഷ്ട്ര വകഭേദവും റിപ്പോർട്ട് ചെയ്തിട്ടുണ്ട്. ഇതിൽ ദക്ഷിണാഫ്രിക്കൻ വകഭേദത്തിന് വാക്സീനിനെ മറികടക്കാൻ പോലും ശേഷിയുണ്ട്. ലോക്ഡൗൺ പ്രഖ്യാപിച്ചില്ലെങ്കിലും വളരെ അത്യാവശ്യത്തിന് മാത്രമേ ജനം പുറത്തിറങ്ങാവൂ. രോഗവ്യാപനം കൂടിയ സ്ഥലങ്ങളിൽ ജോലി ചെയ്യുന്നവർ വീട്ടിലെത്തിയാലും മാസ്ക് ധരിക്കണം. വീട്ടിലുള്ളവരിലേക്ക് പടരുന്നത് ഒഴിവാക്കും.

ഓക്സിജൻ സൗകര്യമുള്ള കിടക്കകൾ ഒരുക്കാൻ വകുപ്പ്

 കോവിഡ് കൂടുന്ന സാഹചര്യത്തിൽ ജില്ലയിൽ ഓക്സിജൻ സൗകര്യമുള്ള കിടക്കകൾ ഒരുക്കാനുള്ള തയാറെടുപ്പിൽ ആരോഗ്യവകുപ്പ്. നിലവിൽ ഓക്സിജൻ നൽകാൻ സൗകര്യമുള്ള കിടക്കകൾ ജില്ലയിൽ ആകെയുള്ളത് 150 താഴെ മാത്രമാണ്. ഇത് സർക്കാർ മേഖലയിലെ കണക്കാണ്. സ്വകാര്യ മേഖലയിൽ ഓക്സിജൻ പൈപ്പ്‌ലൈൻ ഉള്ള ആശുപത്രികളുടെ എണ്ണം കുറവാണ്.

ഉക്കിനടുക്ക മെഡിക്കൽ കോളജ്, ചട്ടംഞ്ചാൽ ടാറ്റാ ആശുപത്രി എന്നിവിടങ്ങളിൽ 74 പേർക്ക് ഓക്സിജൻ നൽകാനുള്ള സൗകര്യമുണ്ട്. ടാറ്റ ആശുപത്രിയിൽ 40 പേർക്ക് കൂടി ഓക്സിജൻ നൽകാൻ കഴിയും വിധത്തിൽ പൈപ്പിടൽ പൂർത്തിയായിട്ടുണ്ട്. ഗുരുവനം ഫസ്റ്റ്‌ലൈൻ ട്രീറ്റ്മെന്റ് സെന്ററിൽ 10 പേർക്ക് ഓക്സിജൻ നൽകാനുള്ള സൗകര്യമുണ്ട്. ജില്ലാ ആശുപത്രിയിൽ ഓക്സിജൻ നൽകാൻ സൗകര്യമുള്ള 40 കിടക്കകളുണ്ട്.

അടിയന്തര ഘട്ടത്തിൽ ഒരുക്കാൻ പാകത്തിന് 30 കിടക്കകൾ കൂടി ജില്ലാ ആശുപത്രിയിൽ ഉണ്ട്. ഇങ്ങനെ വന്നാൽ 70 പേർക്ക് ഓക്സിജൻ നൽകാനുള്ള സൗകര്യം ജില്ലാ ആശുപത്രിയിൽ ഉണ്ടാകും. കാസർകോട് ജനറൽ ആശുപത്രിയിൽ 36 പേർക്ക് ഓക്സിജൻ നൽകാനുള്ള സൗകര്യം ഉണ്ട്. ഇതിന് പുറമേ നീലേശ്വരം താലൂക്ക് ആശുപത്രി, പൂടംകല്ല് താലൂക്ക് ആശുപത്രി, മംഗൽപ്പാടി താലൂക്ക് ആശുപത്രികളിൽ കൂടി ഓക്സിജൻ സംവിധാനം ഒരുക്കാൻ ജില്ലാ ഭരണകൂടം നിർദേശം നൽകിയിട്ടുണ്ട്.

അതിർത്തിയിൽ കർശന പരിശോധന

കോവിഡ് രൂക്ഷമായതിനെ തുടർന്നു കർണാടകയിൽ ലോക്ഡൗൺ നടപ്പാക്കിയതോടെ അതിർത്തി പ്രദേശങ്ങളിലൂടെ പോകുന്ന യാത്രക്കാരെ കർശനമായി നിയന്ത്രിക്കുന്നു. ആശുപത്രിയിലേക്കും മറ്റ് അത്യാവശ്യങ്ങൾക്കുമല്ലാതെ കർണാടകയിലേക്കുള്ള യാത്രകൾ ഒഴിവാക്കണമെന്ന് അധികൃതർ അഭ്യർഥിച്ചിട്ടുണ്ട്.

കാസർകോട് നിന്നു മംഗളൂരു, പുത്തുർ, സുള്ള്യ എന്നിവിടങ്ങളിലേക്കുള്ള കെഎസ്ആർടിസി സർവീസുകൾ തലപ്പാടി, പെർല, പഞ്ചിക്കൽ എന്നിവിടങ്ങളിലേക്കു മാത്രമായി ചുരുക്കുമെന്നു ട്രാൻസ്പോർട്ട് അധികൃതർ അറിയിച്ചു. കർണാടകയിൽ നിന്നുള്ള കെഎസ്ആർടിസി ബസുകൾ ജില്ലയിൽ സർവീസ് നടത്തില്ല. കർണാടകയിൽ 14 ദിവസത്തേക്കാണു സമ്പൂർണ ലോക്ഡൗ‍ൺ ഏർപ്പെടുത്തിയത്.

കാസർകോട് ജില്ലയിൽ നിന്നു മംഗളൂരുവിലെ സ്ഥാപനങ്ങളിലേക്കായി സ്ഥിരം ജോലിക്കു പോകുന്ന നൂറുകണക്കിനാളുകളാണുള്ളത്. ആവശ്യമായ തിരിച്ചറിയൽ രേഖകൾ കാണിച്ചാൽ ഇവരെ കടത്തിവിടും. തലപ്പാടി അതിർത്തിയിൽ നിന്നു കർണാടക പൊലീസ് പരിശോധന നടത്തും. മംഗളൂരു സിറ്റിയിൽ മാത്രമായി നാൽപതിലേറെ കേന്ദ്രങ്ങളിൽ പൊലീസ് പരിശോധനകൾ ഉണ്ടാകും.

ചരക്കുഗതാഗതത്തിനു നിരോധനം ഇല്ലെങ്കിലും കാസർകോട് ജില്ലയിൽ അടക്കം സംസ്ഥാനത്തിന്റെ വിവിധ ഭാഗങ്ങളിൽ പച്ചക്കറി, കോഴിയിറച്ചി തുടങ്ങിയ അവശ്യസാധനങ്ങളുടെ ക്ഷാമം നേരിടാൻ സാധ്യതയുണ്ട്. ട്രെയിൻ ഗതാഗതത്തിനു തടസ്സമില്ല.

മാസ്‌ക് ധരിച്ചില്ല: 1,04,559 പേർക്കെതിരെ നടപടി

കാസർകോട്∙ കോവിഡ് വ്യാപനം രൂക്ഷമായ സാഹചര്യത്തിൽ മാസ്‌ക് ധരിക്കാത്തതിന് ജില്ലയിൽ പൊലീസ് ഇതുവരെ 104,559 പേർക്കെതിരെ നടപടി സ്വീകരിച്ചു. പകർച്ചവ്യാധി നിയമ പ്രകാരം 12144 പേർക്കെതിരെയാണു കേസെടുത്തത്. ജില്ലയിൽ കോവിഡ്-19 പെരുമാറ്റച്ചട്ടം ലംഘിക്കുന്നവർക്കെതിരെ കർശന നടപടി സ്വീകരിക്കുമെന്ന് പൊലീസ് അറിയിച്ചു.

ടെസ്റ്റിന് വിധേയരാകണം

കാസർകോട്∙ തിരഞ്ഞെടുപ്പ് കൗണ്ടിങ് ഡ്യൂട്ടിക്ക് നിയോഗിക്കപ്പെട്ട 2 ഡോസ് വാക്സിനേഷൻ പൂർത്തീകരിക്കാത്ത ഉദ്യോഗസ്ഥർ, കൗണ്ടിങ് ഏജന്റുമാർ എന്നിവർ കൗണ്ടിങ്  ഡ്യൂട്ടി നിർവഹിക്കുന്നതിന് 72 മണിക്കൂർ മുമ്പ് ആർടിപിസിആർ ടെസ്റ്റിന് വിധേയരാകണം. ജില്ലയിലെ 5 നിയോജകമണ്ഡലങ്ങളിലെയും ഓരോ കേന്ദ്രങ്ങളിൽ നാളെ കോവിഡ് ആർടിപിസിആർ പരിശോധനയ്ക്കുള്ള സൗകര്യം ഒരുക്കിയതായി ജില്ലാ മെഡിക്കൽ ഓഫിസർ ഡോ.എ.വി.രാംദാസ് അറിയിച്ചു.

തൃക്കരിപ്പൂർ–  രാവിലെ 10നു നീലേശ്വരം വ്യാപാര ഭവൻ, കാഞ്ഞങ്ങാട് – 10.30ന്  മുനിസിപ്പൽ ടൗൺ ഹാൾ, ഉദുമ–2മണിക്ക്  ഉദുമ പഞ്ചായത്ത് കമ്യൂണിറ്റി ഹാൾ, കാസർകോട് –2 മണിക്ക്  ജനറൽ ആശുപത്രി, മഞ്ചേശ്വരം–രാവിലെ 10ന് മംഗൽപാടി  താലൂക്ക് ആശുപത്രി എന്നിവിടങ്ങളിലാണ് ആർടിപിസിആർ ടെസ്റ്റിനുളള സൗകര്യം ഒരുക്കിയിട്ടുള്ളത്.

ആരോഗ്യ പ്രവർത്തകർക്ക് കോവിഡ് 

നീലേശ്വരം വള്ളിക്കുന്നിലെ നീലേശ്വരം താലൂക്ക് ആശുപത്രിയിൽ 3 ആരോഗ്യ പ്രവർത്തകർ കോവിഡ് പോസിറ്റീവ്. ഇവരുമായി പ്രാഥമിക സമ്പർക്കത്തിൽ വന്ന ആരോഗ്യ പ്രവർത്തകർ ഇതോടെ നിരീക്ഷണത്തിൽ പോയി. കോവിഡ് വാക്സിനേഷൻ, ആന്റിജൻ– ആർടിപിസിആർ പരിശോധനാ ക്യാംപുകൾ എന്നിവയെല്ലാം ഊർജിതമായി നടന്നു വരുന്നതിനിടെ ആരോഗ്യ പ്രവർത്തകരുടെ പരിശോധനാ ഫലം പോസിറ്റീവായത് തിരിച്ചടിയായി.

ഇന്നലെ 300 ൽ അധികം പേർക്കു കോവിഡ് വാക്സീൻ നൽകിയെങ്കിലും ഇന്ന് വാക്സിനേഷൻ ഉണ്ടാകില്ലെന്ന് ആശുപത്രി സൂപ്രണ്ട് ഡോ.എ.ജമാൽ അഹമ്മദ് അറിയിച്ചു. എന്നാൽ ഇതിനു കോവിഡുമായി ബന്ധമില്ലെന്നും വാക്സീൻ സ്റ്റോക്ക് എത്താത്തതിനാലാണെന്നും സൂപ്രണ്ട് പറഞ്ഞു. കുട്ടികൾക്കു ബുധനാഴ്ചകളിൽ നൽകി വരുന്ന പ്രതിരോധ കുത്തിവയ്പും ഇന്നുണ്ടാകില്ല.

ആന്റിജൻ– ആർടിപിസിആർ പരിശോധനകൾ പതിവു പോലെയുണ്ടാകും. ആരോഗ്യ പ്രവർത്തകർ കോവിഡ് പോസിറ്റീവും പ്രാഥമിക സമ്പർക്കത്തെ തുടർന്നു നീരീക്ഷണത്തിലുമായതിനെ തുടർന്ന് ആശുപത്രിയുടെ പ്രവർത്തനങ്ങൾ തടസ്സപ്പെട്ട അവസ്ഥയിലാണ്.