കാസർകോട് സബ് ജയിലിൽ മുബഷ്ശിറിന്റെ ദുരൂഹ മരണം: “ഇത് തുറന്ന കൊലപാതകം” നീതി തേടി കുടുംബം

ദേളി ജംഗ്ഷൻ: കാസർകോട് സബ് ജയിലിൽ അതിക്രൂരവും സംശയാസ്പദവുമായ സാഹചര്യത്തിൽ മരണപ്പെട്ട മുബഷ്ശിർ (29) എന്ന യുവാവിന്റെ മരണത്തിൽ, കുടുംബം ഗുരുതരമായ ക്രിമിനൽ സംശയങ്ങളും മനുഷ്യാവകാശ ലംഘനങ്ങളും ഉന്നയിച്ച് മുഖ്യമന്ത്രി, മനുഷ്യാവകാശ കമ്മീഷൻ, ജില്ലാ പോലീസ് ചീഫ് എന്നിവർക്ക് ഔദ്യോഗികമായി പരാതികൾ നൽകി..മുബഷ്ശിറിന്റെ ഉമ്മ ഹാജിറ എം.എസ് സമർപ്പിച്ച പരാതിയിലൂടെ ഉയർത്തിയ ആരോപണങ്ങൾ കാസർകോട് ജില്ലയെ നടുക്കുന്നവയാണ്.

പരാതിയിൽ പരാമർശിച്ച പ്രധാന വിഷയങ്ങൾ:

മാനസിക രോഗിയല്ലാത്ത മുബഷ്ശിറിന് “മാനസിക രോഗികളുടെ മരുന്ന്” ജയിലിൽ നിർബന്ധിച്ച് കൊടുത്തുവെന്ന സഹതടവുകാരുടെ വെളിപ്പെടുത്തൽ. മരണം സംഭവിക്കുന്നതിന് മൂന്നു ദിവസം മുമ്പ് ബി സെല്ലിൽ നിന്ന് സി സെല്ലിലേക്ക് ദുരൂഹമായി മാറ്റി പാർപ്പിച്ചത് — കാരണമെന്തെന്ന് ജയിൽ അധികൃതർ വ്യക്തമാക്കിയിട്ടില്ല.

മാനസിക രോഗികൾ, എം.ഡി.എം.എ. കുറ്റവാളികൾ, അക്രമചരിത്രമുള്ള തടവുകാർ എന്നിവരോടൊപ്പം മുബഷ്ശിറിനെ പാർപ്പിച്ചത് പൂർണ്ണമായും നിയമവിരുദ്ധമെന്ന കുടുംബത്തിന്റെ ആരോപണം. മരണസമയത്തും മരണ വിവരങ്ങൾ അറിയിച്ചതിലും തെളിവുകളിൽ ഗുരുതര വൈരുദ്ധ്യം — കുടുംബത്തെ അറിയിക്കാതെ അയൽവാസിയുടെ നമ്പറിലേക്ക് വിളിച്ചത് തന്ത്രപരമായ മറുപടി ശ്രമമെന്നും കുടുംബം ചൂണ്ടിക്കാണിക്കുന്നു.

ഹാജിറ എം.എസ് നൽകിയ പരാതിയിൽ,
ജയിൽ വാർഡർമാർ, ഡ്യൂട്ടി ഓഫീസർമാർ, മെഡിക്കൽ സ്റ്റാഫ്, സൂപ്രണ്ടൻറ് എന്നിവരുടെ പങ്ക് പ്രത്യേകം അന്വേഷിക്കണം എന്ന് ആവശ്യപ്പെട്ടിട്ടുണ്ട്.

കുടുംബത്തിന്റെ വാദം വ്യക്തമാണ്:
“മുബഷ്ശിറിന്റെ മരണം സ്വാഭാവികമല്ല — അത് മറച്ചുവെക്കപ്പെട്ട ഒരു കൊലപാതകമാണ്.”

സംഭവത്തിൽ ഉയർന്ന ഗുരുതര ആരോപണങ്ങൾ പശ്ചാത്തലത്തിൽ,
ദേളി ജംഗ്ഷൻ മുബശ്ശിർ ആക്ഷൻ കമ്മിറ്റിയും, ജില്ലാ ജനകീയ നീതി വേദിയും ജില്ലയിലുടനീളം ജനപ്രക്ഷോഭങ്ങൾ ശക്തമാകുന്ന സാഹചര്യത്തിലാണ് കുടുംബം ശക്തമായ നടപടിയും ജുഡീഷ്യൽ അന്വേഷണവും ആവശ്യപ്പെട്ട് മുന്നോട്ടുവരുന്നത്.