ചിക്കൻ വിഭവങ്ങളുടെ സുരക്ഷിതത്വം ഉറപ്പാക്കുക ലക്ഷ്യം;സംസ്ഥാനത്ത് ഭക്ഷ്യസുരക്ഷാ വകുപ്പിന്റെ പരിശോധന
തിരുവനന്തപുരം∙ ചിക്കന് വിഭവങ്ങളുടെ സുരക്ഷിതത്വം ഉറപ്പാക്കാനായി സംസ്ഥാന വ്യാപകമായി ഭക്ഷ്യ സുരക്ഷാ വകുപ്പിന്റെ നേതൃത്വത്തില് പരിശോധന. ചിക്കന് വിഭവങ്ങളില് അളവില് കൂടുതല് കൃത്രിമ നിറങ്ങള് ചേര്ക്കുന്നുവെന്ന പരാതിയെ തുടര്ന്നാണ് വ്യാപാര സ്ഥാപനങ്ങളില് പരിശോധനകള് നടത്തിയത്. സംസ്ഥാന സര്ക്കാര് രൂപീകരിച്ച സ്പെഷല് ടാസ്ക് ഫോഴ്സിന്റെ നേതൃത്വത്തിലാണ് പരിശോധന. ന്യൂ ഇയര് വിപണികളിലുള്ള പരിശോധനകള് ശക്തമായി തുടരുമെന്ന് ആരോഗ്യ മന്ത്രി വീണാ ജോർജ് പറഞ്ഞു.
അല് ഫാം, തന്തൂരി ചിക്കന്, ഗ്രില്ഡ് ചിക്കന്, ഷവായ തുടങ്ങിയ ഭക്ഷണങ്ങള് വില്ക്കുന്ന കടകള് കേന്ദ്രീകരിച്ചായിരുന്നു പരിശോധന. സംസ്ഥാന വ്യാപകമായി 35 സ്ക്വാഡുകളുടെ നേതൃത്വത്തില് ആകെ 448 സ്ഥാപനങ്ങളിലാണ് പരിശോധന നടത്തിയത്. 75 സ്റ്റ്യാറ്റ്യൂട്ടറി സാംപിളുകളും 19 സര്വെലന്സ് സാംപിളുകളും പരിശോധനയ്ക്കയച്ചു. പരിശോധനാ ഫലത്തിന്റെ അടിസ്ഥാനത്തില് ശക്തമായ തുടര് നടപടികള് സ്വീകരിക്കും. വീഴ്ചകള് കണ്ടെത്തിയ 15 സ്ഥാപനങ്ങളുടെ പ്രവര്ത്തനം നിര്ത്തിവയ്പ്പിച്ചു. 49 സ്ഥാപനങ്ങള്ക്ക് റെക്ടിഫിക്കേഷന് നോട്ടിസും 74 സ്ഥാപനങ്ങള്ക്ക് കോംപൊണ്ടിങ് നോട്ടിസും നല്കി.
കേക്ക്, വൈന്, ബേക്കറി വസ്തുക്കള് നിര്മ്മിക്കുന്ന ബോര്മകള്, ബേക്കറി, മറ്റ് ചെറുകിട സംരംഭങ്ങള് എന്നിവിടങ്ങളിലും പരിശോധന നടത്തുന്നുണ്ട്. മത്സ്യ, മാംസ ഉൽപ്പന്നങ്ങളുടെ വിപണന കേന്ദ്രങ്ങളിലും പരിശോധന നടന്നു വരുന്നു