കെ.എം.ബഷീറിനെ വാഹനമിടിപ്പിച്ച് കൊലപ്പെടുത്തിയ കേസ്: ശ്രീറാം വെങ്കിട്ടരാമന് കോടതിയില് ഹാജരായി
തിരുവനന്തപുരം: മാധ്യമ പ്രവര്ത്തകന് കെ.എം.ബഷീറിനെ വാഹനം ഇടിച്ചു കൊലപ്പെടുത്തിയ കേസില് പ്രതിയായ ശ്രീറാം വെങ്കിട്ടരാമന് കോടതിയില് ഹാജാരായി. കുറ്റപത്രം വായിച്ചു കേള്ക്കുന്നതിന്റെ ഭാഗമായാണു ശ്രീറാം കോടതിയില് ഹാജരായത്. തിരുവനന്തപുരം ഒന്നാം അഡീഷനല് സെഷന്സ് കോടതിയാണു കേസ് പരിഗണിക്കുന്നത്. കഴിഞ്ഞ മാസം കേസ് പരിഗണിച്ചപ്പോള് ശ്രീറാം ഹാജരായിരുന്നില്ല.
കുറ്റപത്രം വായിക്കുന്നതിനു മുൻപുള്ള പ്രാഥമിക വാദം കോടതി കഴിഞ്ഞ തവണ കേട്ടു. കഴിഞ്ഞ തവണ ശ്രീറാം കോടതിയില് ഹാജരാകാത്തതിനു കോടതി വാക്കാൽ താക്കീതു നല്കിയിരുന്നു. അപകടം സംഭവിച്ചിട്ട് അഞ്ചു വര്ഷം പിന്നിട്ടു. മജിസ്ട്രേട്ട് കോടതി മുതല് സുപ്രീംകോടതി വരെ കേസ് പരിഗണിച്ചെങ്കിലും വിചാരണ നടപടികള് ആരംഭിച്ചിരുന്നില്ല. ഇതിനിടയില് കേസില് 2 പ്രതികള് എന്നത് ഒന്നായി. രണ്ടാം പ്രതി വഫ ഫിറോസിനെ കോടതി കുറ്റപത്രത്തില്നിന്നും ഒഴിവാക്കി. 2019 ഓഗസ്റ്റ് മൂന്നു പുലര്ച്ചെ ഒരു മണിയ്ക്കാണ് ഇവർ സഞ്ചരിച്ചിരുന്ന കാര് ഇടിച്ചു മാധ്യമ പ്രവര്ത്തകനായ ബഷീറിന്റെ മരണം സംഭവിച്ചത്.