കാലവർഷക്കെടുതിയിൽ ജില്ലയിൽ 3180 കർഷകർക്ക് കൃഷിനാശം; 2.78 കോടിയുടെ നഷ്ടം

കാസർകോട്: കാലവർഷത്തിൽ ജില്ലയിൽ 3180 കർഷകർക്ക് വിളനാശം. 2.78 കോടി രൂപയുടെ നഷ്ടമാണ് ജില്ലയിലുണ്ടായത്. 37 ഹെക്ടർ സ്ഥലത്താണ് കാലവർഷ കെടുതി നാശം വിതച്ചത്. ഈവർഷം ജൂൺ ഒന്നുമുതൽ ഏറ്റവും കനത്ത മഴയും വെള്ളപ്പൊക്കവുമുണ്ടായ ആഗസ്റ്റ് അഞ്ചുവരെ കാലയളവിലേതാണ് ഈ കണക്ക്. പരപ്പ ബ്ലോക്കിലാണ് ഏറ്റവും കൂടുതൽ വിളനാശം. 26.05 ഹെക്ടറിൽ 955 കർഷകർക്ക് 1.30 കോടി രൂപയുടെ നാശ നഷ്ടമാണ് ഉണ്ടായിട്ടുള്ളത്. നീലേശ്വരം ബ്ലോക്കിൽ 9.73 ഹെക്ടറിൽ 674 കർഷകർക്ക് 56.74 ലക്ഷം രൂപയുടെ നഷ്ടമുണ്ടായിട്ടുണ്ട്. കാഞ്ഞങ്ങാട് ബ്ലോക്കിൽ 36.94 ഹെക്ടറിൽ 576 കർഷകർക്ക് 39.79 ലക്ഷം രൂപയുടെ നഷ്ടമുണ്ടായിട്ടുണ്ട്. കാറടുക്ക 74.47 ഹെക്ടറിൽ 305 കർഷകർക്ക് 17.60 ലക്ഷം രൂപയുടെ നഷ്ടമുണ്ടായി. കാസർകോട് 62.48 ഹെക്ടറിൽ 502 കർഷകർക്ക് 16.12 ലക്ഷം രൂപയുടെ നഷ്ടമാണ് സംഭവിച്ചത്.

മഞ്ചേശ്വരത്ത് 520.23 ഹെക്ടറിൽ 168 കർഷകർക്ക് 17.49 ലക്ഷം രൂപയുടെ നഷ്ടവും ഉണ്ടായി. അടക്ക കർഷകർക്കാണ് ഏറ്റവും വലിയ നഷ്ടമുണ്ടായിട്ടുള്ളത്. വിളയുള്ള കവുങ്ങുകൾ 10531 എണ്ണമാണ് നശിച്ചത്. 7.68 ഹെക്ടറിൽ 1,182 കർഷകർക്കാണ് ഈ നാശം. 31.59 ലക്ഷം രൂപയുടെ കവുങ്ങ് കൃഷിയാണ് നശിച്ചത്. 0.180 ഹെക്ടറിലാണ് ഏലം നശിച്ചത്. ആറ് കർഷകരെയാണ് ബാധിച്ചത്. ഒരു ഹെക്ടറിൽ പ്ലാവ് നശിച്ചു. 2390 പേരുടെ വിളയുള്ള തെങ്ങ് നശിച്ചു. 13.66 ഹെക്ടറിൽ 896 പേർക്കാണ് നഷ്ടം. 1.19 കോടി രൂപയുടെ കായ്ഫലമുള്ള തെങ്ങുകളാണ് കടപുഴകിയത്. 113 തൈത്തെങ്ങുകളും നശിച്ചു. 8775 കുലച്ച നേന്ത്ര വാഴകൃഷി നശിച്ചു. 3.51 ഹെക്ടറിൽ 565 പേർക്കാണ് വാഴ കൃഷി നശിച്ചത്. 52.65 ലക്ഷമാണ് നഷ്ടം.

166 കർഷകരുടെ 2700 കുലക്കാത്ത വാഴകൾ നശിച്ചു. 10.80 ലക്ഷം രൂപയുടെ നഷ്ടമാണ് ഇതുവഴിയുണ്ടായത്. 153 കർഷകരുടെ 1040 പാലെടുക്കുന്ന റബർമരങ്ങൾ നശിച്ചു. 29 കർഷകരുടെ 365 പാലെടുക്കാത്ത റബർ മരങ്ങളാണ് കടപുഴകിയത്. രണ്ട് കർഷകരുടെ രണ്ടുവീതം കശുമാവുകൾ ആറ് കർഷകരുടെ 16 കൊക്കോ മരങ്ങൾ, 22 കർഷകരുടെ 145 കുരുമുളക് കൃഷികൾ, അഞ്ച് കർഷകരുടെ പച്ചക്കറി പന്തൽ എന്നിവ നശിച്ചു. 7.250 ഹെക്ടറിലാണ് നെൽകൃഷി നശിച്ചത്. 17 കർഷകർക്കാണ് കൃഷി നാശം. 10 ലക്ഷം നഷ്ടം കണക്കാക്കുന്നു. ആകെ 37.89 ഹെക്ടറിൽ 3,180 പേർക്ക് 278.21 ലക്ഷത്തിന്റെ നഷ്ടമാണ് ഉണ്ടായിട്ടുള്ളത്.