ആദ്യ റൗണ്ടില് യുഡിഎഫിന് വ്യക്തമായ ലീഡ്; പിടിയേക്കാളും വോട്ട് പിടിച്ച് ഉമ..
കൊച്ചി: തൃക്കാക്കര ഉപതിരഞ്ഞെടുപ്പിന്റെ വോട്ടെണ്ണല് ആരംഭിച്ചു. ആദ്യ ഫലസൂചനകള് പുറത്തുവരുമ്പോള് യുഡിഎഫ് ലീഡ് ചെയ്യുന്നു. എറണാകുളം മഹാരാജാസ് കോളേജിലാണ് വോട്ടെണ്ണല്. രാവിലെ 7.30-ന് സ്ഥാനാര്ഥികളുടെയും രാഷ്ട്രീയപ്പാര്ട്ടി പ്രതിനിധികളുടെയും സാന്നിധ്യത്തില് സ്ട്രോങ് റൂം തുറന്ന് വോട്ടിങ് യന്ത്രങ്ങള് പുറത്തെടുത്തു. എട്ടുമണിയോടെ വോട്ടെണ്ണല് തുടങ്ങി.
ആദ്യം തപാല് വോട്ടുകളാണ് എണ്ണിയത്. 10 പോസ്റ്റല് ബാലറ്റുകള് മാത്രമേയുള്ളൂ. മുഴുവന് വോട്ടുകളും എണ്ണിത്തീരാന് 12 റൗണ്ട് വേണം. ഒരു റൗണ്ടില് 21 ബൂത്തുകളാണ് എണ്ണുക. ആദ്യ റൗണ്ടില് ഓക്സിലറി ബൂത്തുകള് ഉള്പ്പെടെ ഒന്നു മുതല് 15 വരെയുള്ള ബൂത്തുകളിലെ വോട്ടുകള് എണ്ണും. തുടര്ന്ന് മറ്റ് ബൂത്തുകളിലെ വോട്ടുകള് എണ്ണും. ഇത്തരത്തില് 12 റൗണ്ടുകളുണ്ടാകും. ആദ്യ 11 റൗണ്ടുകളില് 21 ബൂത്തുകള് വീതവും അവസാന റൗണ്ടില് എട്ട് ബൂത്തുകളും എണ്ണും. 239 ബൂത്തുകളാണ് തൃക്കാക്കര നിയോജകമണ്ഡലത്തിലുള്ളത്.