മൂന്നാം ഏകദിനത്തില് 90 റണ്സിന്റെ വമ്പന് വിജയം, ന്യൂസീലന്ഡിനെതിരായ പരമ്പര തൂത്തുവാരി ഇന്ത്യ
ഇന്ദോര്: മൂന്നില് മൂന്ന് ന്യൂസീലന്ഡിനെതിരായ ഏകദിന പരമ്പര തൂത്തുവാരി ഇന്ത്യ. പരമ്പരയിലെ മൂന്നാമത്തെയും അവസാനത്തെയും മത്സരത്തില് കിവീസിനെ 90 റണ്സിന് തകര്ത്താണ് ഇന്ത്യ പരമ്പര നേടിയത്. ഇന്ത്യ ഉയര്ത്തിയ 386 റണ്സ് വിജയലക്ഷ്യത്തിലേക്ക് ബാറ്റേന്തിയ ന്യൂസീലന്ഡ് 41.2 ഓവറില് 295 റണ്സിന് ഓള് ഔട്ടായി. സെഞ്ചുറി നേടിയ ഡെവോണ് കോണ്വെ മാത്രമാണ് കിവീസിനായി പിടിച്ചുനിന്നത്. സെഞ്ചുറി നേടിയ രോഹിത് ശര്മയും ശുഭ്മാന് ഗില്ലുമാണ് ഇന്ത്യയുടെ വിജയത്തിന് നേതൃത്വം നല്കിയത്. ആദ്യ രണ്ട് മത്സരങ്ങളും വിജയിച്ച ഇന്ത്യ നേരത്തേ പരമ്പര സ്വന്തമാക്കിയിരുന്നു. പടുകൂറ്റന് വിജയലക്ഷ്യവുമായി മറുപടി ബാറ്റിങ്ങിനിറങ്ങിയ ന്യൂസീലന്ഡിന് തുടക്കത്തില് തന്നെ തിരിച്ചടി നേരിട്ടു. ആദ്യ ഓവറിലെ രണ്ടാം പന്തില് തന്നെ ഫിന് അലനെ മടക്കി ഹാര്ദിക് പാണ്ഡ്യ ന്യൂസീലന്ഡിനെ ഞെട്ടിച്ചു. ഹാര്ദിക്കിന്റെ ബൗണ്സര് പ്രതിരോധിച്ച അലന്റെ ബാറ്റില് തട്ടിയ പന്ത് വിക്കറ്റ് പിഴുതു. മൂന്നാമനായി വന്ന ഹെന്റി നിക്കോള്സിനെ കൂട്ടിപിടിച്ച് ഓപ്പണര് ഡെവോണ് കോണ്വെ അടിച്ചുതകര്ത്തു.