താനൂര് ബോട്ടപകടം; ഒരാള്കൂടി പിടിയില്
മലപ്പുറം:താനൂരില് ബോട്ട് മറിഞ്ഞ് 22 പേര് മരിച്ച സംഭവത്തില് ഒരാള് കൂടി പൊലീസ് പിടിയിലായി. താനൂര് സ്വദേശി മുഹമ്മദ് റിന്ഷാദാണ് പിടിയിലായത്.ഇതോടെ കേസില് പിടിയിലായവരുടെ എണ്ണം പത്തായി. ബോട്ട് ജീവനക്കാരന് സവാദിനെ ഇന്നലെ പൊലീസ് പിടികൂടിയിരുന്നു. പ്രതികളില് മൂന്ന് പേര് ബോട്ട് ഉടമയെ ഒളിവില് പോകാന് സഹായിച്ചവരാണ്. ബോട്ടിന്റെ ഉടമ താനൂര് സ്വദേശി നാസര്, ഇയാളെ രക്ഷപ്പെടാന് സഹായിച്ച സഹോദരന് സലാം (53), മറ്റൊരു സഹോദരന്റെ മകന് വാഹിദ് (27), നാസറിന്റെ സുഹൃത്ത് മുഹമ്മദ് ഷാഫി (37), ബോട്ട് ഓടിച്ച സ്രാങ്ക് ദിനേശന്, ബോട്ടിന്റെ മാനേജര് അനില്, സഹായികളായ ബിലാല്, ശ്യാം കുമാര് എന്നിവരാണ് അറസ്റ്റിലായ മറ്റുള്ളവര്. ബോട്ടുടമ നാസറിനെ 14 ദിവസത്തേക്ക് റിമാന്ഡ് ചെയ്തതിനെത്തുടര്ന്ന് തിരൂര് സബ് ജയിലിലേക്കു മാറ്റിയിരുന്നു.