369 ‘ നമ്ബർ ഡിക്യുവിന്റേതല്ലേ ? നിയമം ലംഘിച്ചതിന് പോർഷെ പനമേറ പിന്നിലേക്ക് എടുപ്പിച്ച് പൊലീസ് , വീഡിയോ ഏറ്റെടുത്ത് ആരാധകർ
369′ നമ്ബരുകളിലുള്ള വാഹനങ്ങള്‍ ആരുടെതെന്ന് ചോദിച്ചാല്‍ മലയാളികള്‍ ചിന്തിക്കാതെ തന്നെ പറയും, അത് ഡിക്യൂവിന്റേതാണെന്ന്. ആ വാഹനങ്ങള്‍ ഏത് തിരക്കിലും ആരാധകരുടെ ശ്രദ്ധ നേടാറുമുണ്ട്. മമ്മൂട്ടിയുടെ അതെ വാഹന പ്രേമം മകന്‍ ദുല്‍ക്കറിനും കിട്ടിയിട്ടുണ്ട്.
ഇപ്പോഴിതാ ഒരു ‘369’ വാഹനത്തിന്‍റെ വീഡിയോയാണ് സോഷ്യല്‍ മീഡിയയില്‍ വൈറല്‍. ദുല്‍ഖര്‍ സല്‍മാന്‍റെ ഉടമസ്ഥതയിലുള്ള പോര്‍ഷെ പനമേറ ടര്‍ബോ സ്പോര്ട്സ് കാര്‍ ആണ് വീഡിയോയിലെ പ്രധാന ശ്രദ്ധാകേന്ദ്രം.
ഒരു ട്രാഫിക് സിഗ്നലിന് സമീപം മീഡിയന് വലതുവശത്ത് സിഗ്നല്‍ കാത്തുകിടക്കുകയാണ് വീഡിയോയില്‍ ഈ കാര്‍. ട്രാഫിക് നിയമ ലംഘനം ശ്രദ്ധയില്‍പ്പെട്ട ഡ്യൂട്ടിയിലുള്ള പൊലീസുകാരന്‍ അവിടേക്ക് എത്തുന്നതും തുടര്‍ന്ന് അതേ ലൈനില്‍ റിവേഴ്സ് ഗിയറില്‍ എടുത്ത് വാഹനം ശരിയായ ദിശയില്‍ പോകുന്നതും വീഡിയോയില്‍ നമുക്ക് കാണാനാകും. വീഡിയോ നമ്ബര്‍ പ്ലേറ്റ് ശ്രദ്ധയില്‍പ്പെട്ട രണ്ട് യുവാക്കളാണ് എടുത്തിരിക്കുന്നത്. തങ്ങളുടെ ഇരുചക്ര വാഹനത്തില്‍ ഇവര്‍ ഈ കാറിനെ ഫോളോ ചെയ്യുന്നുമുണ്ട്. ‘കുഞ്ഞിക്ക’ എന്നു വിളിക്കുമ്ബോള്‍ ഡ്രൈവിംഗ് സീറ്റില്‍ ഇരിക്കുന്നയാള്‍ ഇവരെ അഭിവാദ്യം ചെയ്യുന്നതും കാണാം.
എന്നാല്‍ വിന്‍ഡ് സ്ക്രീന്‍ കയറ്റി ഇട്ടിരിക്കുന്നതിനാല്‍ ഇത് ദുല്‍ഖര്‍ ആണോ എന്നത് വ്യക്തവുമല്ല. ഏതായാലും വീഡിയോ സോഷ്യല്‍ മീഡിയയില്‍ വൈറലാണ്. 2018-ലാണ് തന്‍റെ കാര്‍ ശേഖരത്തിലേക്ക് നീല നിറത്തിലുള്ള പോര്‍ഷെ പനമേറ ടര്‍ബോ കൂടി ദുല്‍ഖര്‍എത്തിക്കുന്നത്.
സ്പോര്ട്സ് കാറുകളില്‍ നാലു പേര്‍ക്ക് സഞ്ചരിക്കാവുന്ന അപൂര്‍വ്വം വാഹനങ്ങളില്‍ ഒന്നാണ് ഇത്. 100 കിലോമീറ്റര്‍ വേഗത കൈവരിക്കാന്‍ 3.8 സെക്കന്‍ഡ് മാത്രം ആവശ്യമുള്ള ഈ കാറിന് രണ്ട് കോടിക്കു മുകളിലാണ് വില.