നിങ്ങൾ പോരാടിയത് സ്നേഹവും സത്യവും കരുണയും കൊണ്ട്; രാഹുലിന് പ്രിയങ്കയുടെ ഹൃദയഹാരിയായ കുറിപ്പ്
ന്യൂഡൽഹി: ലോക്സഭ തിരഞ്ഞെടുപ്പില് മത്സിച്ച രണ്ട് സീറ്റിലും ലക്ഷങ്ങളുടെ ഭൂരിപക്ഷത്തില് വിജയിച്ച സഹോദരന് രാഹുലിനെ അഭിനന്ദിച്ച് കുറിപ്പെഴുതി പ്രിയങ്ക ഗാന്ധി. രാഹുല് പോരാടിയത് സ്നേഹവും കരുണയും സത്യവും കൊണ്ടാണെന്ന് പറഞ്ഞുള്ള ഹൃദയഹാരിയായ കുറിപ്പാണ് സഹോദരിയും കോണ്ഗ്രസ് നേതാവുമായ പ്രിയങ്ക ഗാന്ധി ട്വിറ്ററില് കുറിച്ചത്. പലരും ദേഷ്യവും വൈരാഗ്യവും നുണപ്രചാരണങ്ങളും രാഹുലിന് നേരെ ചൊരിഞ്ഞപ്പോഴും അത് തിരിച്ചുകാണിക്കാതെ, നുണപ്രചാരണങ്ങളില് വീഴാതെ രാഹുല് മുന്നോട്ടു പോയെന്നും പ്രിയങ്ക കുറിച്ചു.
“അവരെന്തൊക്കെ നിങ്ങളോട് പറഞ്ഞാലും ചെയ്താലും നിങ്ങള് തലയുയര്ത്തി തന്നെ നിന്നു. അരുതാത്തത് പലതും സംഭവിച്ചപ്പോഴും നിങ്ങള് പിന്മാറിയില്ല. നിങ്ങളുടെ ബോധ്യങ്ങളെ മറ്റുള്ളവര് സംശയിച്ചപ്പോഴും നിങ്ങള് മുന്നോട്ടു പോയി. അവരുടെ വലിയ നുണപ്രചാരണങ്ങള്ക്കിടിയിലും സത്യത്തിനു വേണ്ടിയുള്ള പോരാട്ടം നിങ്ങള് അവസാനിപ്പിച്ചില്ല. ദേഷ്യവും വെറുപ്പും നിങ്ങള്ക്ക് നേരെ അവര് ചൊരിഞ്ഞപ്പോഴും അത് നിങ്ങളെ പ്രകോപിപ്പിച്ചില്ല. നിങ്ങള് സ്നേഹം കൊണ്ടും സത്യം കൊണ്ടും ഹൃദയത്തില് നിന്നുള്ള കരുണകൊണ്ടും പോരാടി. നിങ്ങളെ ഇത്രനാളും കാണാതിരുന്നവര് ഇന്നു നിങ്ങളെ കാണുന്നു. പക്ഷെ, ഒന്നു പറയട്ടെ അപ്പോഴും ഞങ്ങളില് ചിലര് നിങ്ങളെ എല്ലാവരേക്കാളും ധൈര്യശാലിയായാണ് എന്നും കാണുകയും അറിയുകയും ചെയ്തിട്ടുള്ളത്.” പ്രിയങ്ക കുറിച്ചു
ഉത്തർപ്രദേശിലെ റായ്ബറേലി മണ്ഡലത്തിൽനിന്ന് അതിഗംഭീര വിജയത്തിലേക്ക് കടന്ന രാഹുല് ഗാന്ധിയുടെ ഭൂരിപക്ഷം യു.പിയിലെ തന്നെ ഏറ്റവും വലിയ ഭൂരിപക്ഷമാണ്. 3.90 ലക്ഷത്തിലധികം വോട്ടുകള്ക്കാണ് ബി.ജെ.പിയിലെ ദിനേഷ് പ്രതാപ് സിങ്ങിനെ രാഹുല് തറപറ്റിച്ചത്. ഉത്തർപ്രദേശിലെ തന്നെ വാരണാസിയിൽ നിന്ന് മത്സരിച്ച പ്രധാനമന്ത്രി നരേന്ദ്ര മോദിയുടെ 1.5 ലക്ഷം വോട്ടിന്റെ ഭൂരിപക്ഷത്തിന്റെ ഇരട്ടിയിലധികം ഭൂരിപക്ഷമാണ് രാഹുല് ഗാന്ധിക്ക് ലഭിച്ചിരിക്കുന്നത്. ഇതോടെ ഉത്തർപ്രദേശിലെ തന്നെ ഏറ്റവും വലിയ ഭൂരിപക്ഷം രാഹുലിന്റേതായി. വയനാട്ടിലും മൂന്നര ലക്ഷത്തിലധികം വരുന്ന വോട്ടുകളുടെ ഭൂരിപക്ഷത്തിലാണ് രാഹുൽ വിജയിക്കുന്നത്.