ട്രംപ് ഇഫക്റ്റ്: റീപ്പോ നിരക്കിൽ മാറ്റംവരുത്താതെ റിസർവ് ബാങ്ക്; ഇഎംഐ ഭാരം കുറയില്ല

ന്യൂഡൽഹി: പ്രതീക്ഷിച്ചതുപോലെ അടിസ്ഥാന പലിശ നിരക്കിൽ‌ മാറ്റംവരുത്താതെ പണനയം പ്രഖ്യാപിച്ച് റിസർവ് ബാങ്ക്. റീപ്പോ നിരക്ക് 5.50 ശതമാനത്തിൽ നിലനിർത്തി. ഇതോടെ ബാങ്ക് വായ്പകളുടെ പലിശനിരക്കിൽ ഇനി കുറവുണ്ടാകാനുള്ള സാധ്യത മങ്ങി. ഭവന, വാഹന, വ്യക്തിഗത വായ്പാ ഇടപാടുകാരുടെ ഇഎംഐ ഭാരവും കുറയില്ല.

ഫെബ്രുവരിയിലും ഏപ്രിലിലും ജൂണിലുമായി റീപ്പോ നിരക്ക് ഒരു ശതമാനം കുറച്ചിരുന്നു. ഓഗസ്റ്റിലെ യോഗത്തിലും കുറയ്ക്കാനുള്ള സാധ്യത ഉണ്ടായിരുന്നെങ്കിലും യുഎസ് പ്രസിഡന്റ് ഡോണൾ‌ഡ് ട്രംപ് താരിഫ് പ്രശ്നങ്ങൾ കൂടുതൽ വഷളാക്കുകയും ഇന്ത്യയ്ക്കെതിരെ താരിഫ് പോര് കടുപ്പിക്കുകയും ചെയ്ത പശ്ചാത്തലത്തിലാണ് പലിശനിരക്കുകൾ നിലനിർത്താനുള്ള പണനയ നിർണയ സമിതിയുടെ (എംപിസി) തീരുമാനം. പണനയം സംബന്ധിച്ച റിസർവ് ബാങ്കിന്റെ ‘നിലപാട്’ (സ്റ്റാൻസ്) ന്യൂട്രൽ ആയി നിലനിർത്താനും എംപിസി ഐകകണ്ഠ്യേന തീരുമാനിച്ചെന്ന് റിസർവ് ബാങ്ക് ഗവർണർ സഞ്ജയ് മൽഹോത്ര പറഞ്ഞു.