കോച്ച് കളത്തിലില്ലാതെ ബ്ലാസ്റ്റേഴ്സ് ഇന്ന് ഒഡീഷ എഫ്സിക്കെതിരെ
തരംതാഴ്ത്തല് ഭീഷണിയില് നിന്ന് തലനാരിഴക്ക് രക്ഷപ്പെട്ടുവെന്ന ആശ്വാസത്തില് ഐഎസ്എല്ലില് കേരള ബ്ലാസ്റ്റേഴ്സ് ഇന്ന് ഒഡീഷ എഫ്സിക്കെതിരെ സ്വന്തം ഗ്രൗണ്ടായ കൊച്ചി കലൂര് രാജീവ് ഗാന്ധി സ്റ്റേഡിയത്തിലിറങ്ങും. രണ്ട് മഞ്ഞക്കാര്ഡുകള് കണ്ടതിനെ തുടര്ന്ന് ബ്ലാസ്റ്റേഴ്സ് കോച്ച് ആഷി വെസ്റ്റ് വുഡിന് പുറത്തിരിക്കേണ്ടി വരുന്ന മത്സരത്തില് അസിസ്റ്റന്റ് കോച്ച് പീറ്റര് ഹാര്ഡ്ലിയായിരിക്കും മത്സരത്തിനിടയില് കളിക്കാര്ക്ക് നിര്ദ്ദേശങ്ങള് നല്കുക. ജംഷഡ്പുര് എഫ്സിക്കെതിരെ മിന്നും പ്രകടനം കാഴ്ച്ചവെച്ച മൊറോക്കന് മിഡ്ഫീല്ഡര് കരിം ബെനാരിഫ് ഇന്നത്തെ മത്സരത്തില് ഉണ്ടായേക്കില്ല. അതേ സമയം കോച്ച് ആഷി വെസ്റ്റ് വുഡിന്റെയും കരീം ബെരാരിഫിന്റെയും അസാന്നിധ്യം ഇന്നത്തെ മത്സരത്തെ ഒരു തരത്തിലും ബാധിക്കില്ലെന്ന് ബ്ലാസ്റ്റേഴ്സ് അസിസ്റ്റന്റ്റ് കോച്ച് പീറ്റര് ഹാര്ഡ്ലി പറഞ്ഞു. ആഷി വെസ്റ്റവുഡ് ഗ്രൗണ്ടില് ഉണ്ടാകില്ലെ ങ്കിലും കളിയുടെ ശൈലിയും തന്ത്രങ്ങളും എല്ലാം അദ്ദേഹത്തിന്റേത് തന്നെയായിരിക്കും. അത് വിജയിക്കാനുള്ളതുമായിരിക്കും.
ആദ്യ ഏഴ് മത്സരങ്ങളില് നിന്ന് ഒരു പോയിന്റ് മാത്രമായിരുന്നു ബ്ലാസ്റ്റേഴ്സിന് ഉണ്ടായിരുന്നത്. എന്നാല് ആഷി വെസ്റ്റ് വുഡ് ഇടക്കാല കോച്ച് ആയി ചുമതലയേറ്റതിന് ശേഷം മൂന്ന് കളികളില് രണ്ട് വിജയവും ഒരു സമനിലയും അടക്കം ഏഴ് പോയിന്റാണ് ടീം സ്വന്തം പേരിലാക്കിയത്. വെസ്റ്റ് വുഡിന്റെ ശിക്ഷണത്തില് ബ്ലാസ്റ്റേഴ്സ് ഇന്ന് ആത്മവിശ്വാസത്തോടെയായിരിക്കും ഒഡീഷയെ നേരിടുക. ഏറ്റവും അവസാനമായി ജംഷഡ്പുരിനെതിരെ ബ്ലാസ്റ്റേഴ്സ് ഇതുവരെ കണ്ടതില് വെച്ച് ഏറ്റവും മികച്ച പ്രകടനമാണ് പുറത്തെടുത്തത്. രണ്ട് ഗോളുകളടിച്ച ടീം പ്രതിരോധത്തിലും അതീവ ശ്രദ്ധ പുലര്ത്തിയാണ് കളിച്ചത്. ഈ ഫോം തുടരുകയെന്നതാണ് ടീമിന്റെ പ്രധാന ലക്ഷ്യം. എട്ടുപോയിന്റുമായി 11 -ാം സ്ഥാനത്തേക്ക് എത്താന് ഇന്ന് ജയിക്കണം.