ജമ്മു കാശ്മീരിലെ പ്രളയവും മണ്ണിടിച്ചിലും: 30 പേര്‍ മരിച്ചതായി റിപ്പോര്‍ട്ട്; നിരവധി പേര്‍ക്ക് പരിക്ക്
ശ്രീനഗർ: ജമ്മു കാശ്മീരിലെ ദോഡയില്‍ മേഘവിസ്ഫോടനത്തെ തുടർന്നുണ്ടായ മിന്നല്‍ പ്രളയത്തിലും മാതാ വൈഷ്‌ണോ ദേവീ ക്ഷേത്ര പാതയിലെ മണ്ണിടിച്ചിലിലും മരണം 30 ആയി.
നിരവധി പേർക്ക് പരിക്കേറ്റു. മരണസംഖ്യ 30 കഴിഞ്ഞെന്ന് സീനിയർ പോലീസ് സൂപ്രണ്ട് പരംവീർ സിംഗ് സ്ഥിരീകരിച്ചു. സ്ഥലത്ത് എൻഡിആർഎഫ് സംഘം രക്ഷാപ്രവർത്തനം നടത്തുകയാണ്.
ഹിമാചല്‍ പ്രദേശില്‍ കനത്ത മഴയിലും മണ്ണിടിച്ചിലിലും ദേശീയ പാതകളടക്കം നിരവധി റോഡുകളില്‍ ഗതാഗതം തടസപ്പെട്ടു. ഇന്നലെ വൈകിട്ട് 3 ഓടെയാണ് റിയാസിയിലെ വൈഷ്‌ണോ ദേവീ ക്ഷേത്രത്തിലേക്കുള്ള ട്രക്കിംഗ് പാതയില്‍ മണ്ണിടിച്ചിലുണ്ടായത്. നിരവധി പേരെ കാണാതായി. പ്രദേശത്ത് സൈന്യം രക്ഷാപ്രവർത്തനം തുടരുകയാണ്. അപകടത്തെ തുടർന്ന് വൈഷ്‌ണോ ദേവീ ക്ഷേത്രത്തിലേക്കുള്ള യാത്ര താത്കാലികമായി നിറുത്തിവച്ചു.
തവി,രവി നദികള്‍ കരകവിഞ്ഞതിനാല്‍ ജമ്മുവില്‍ പ്രളയ മുന്നറിയിപ്പും നല്‍കി. ജമ്മു-ശ്രീനഗർ 250 കിലോമീറ്റർ ദേശീയപാത മണ്ണിടിച്ചിലിനെ തുടർന്ന് അടച്ചു. റാംനഗർ-ഉധംപൂർ,ജൻഗല്‍വർ-തത്രി തുടങ്ങിയ റോഡുകളില്‍ മിന്നല്‍ പ്രളയവും മണ്ണിടിച്ചിലും കാരണം ഗതാഗതം തടസപ്പെട്ടു. കാശ്മീർ താഴ് വരയെ കിഷ്ത്വാറുമായി ബന്ധിപ്പിക്കുന്ന സിൻതാൻ ടോപ് പാസ് അടച്ചു. ശ്രീനഗർ -ലേ ദേശീയപാത കനത്ത മഞ്ഞുവീഴ്ചയെ തുടർന്ന് അടച്ചു.
സ്ഥിതി നിരീക്ഷിച്ചുവരികയാണെന്നും സൈന്യം രക്ഷാപ്രവർത്തനം നടത്തുന്നുണ്ടെന്നും കേന്ദ്ര മന്ത്രി ജിതേന്ദ്ര സിംഗ് അറിയിച്ചു. ജനങ്ങള്‍ ജാഗ്രത പാലിക്കണമെന്നും മുഖ്യമന്ത്രി ഒമർ അബുദുള്ള പറഞ്ഞു. അതിശക്തമായ മഴ ഹിമാചല്‍പ്രദേശില്‍ പ്രളയസമാന സാഹചര്യം സൃഷ്ടിച്ചു. മണാലി-ലേ,കുളു-മണാലി ദേശീയപാതകളടക്കം ഒട്ടേറെ റോഡുകളില്‍ മണ്ണിടിച്ചിലിനെ തുടർന്ന് ഗതാഗതം തടസപ്പെട്ടു. നിരവധി കെട്ടിടകള്‍ തകർന്നു. മണാലിയില്‍ ബിയാസ് നദി കരകവിഞ്ഞൊഴുകി നാല് നില ഹോട്ടല്‍ കെട്ടിടം ഒലിച്ചുപോയി. വെള്ളപ്പൊക്കത്തെ തുടർന്ന് കുളു, മണാലി മേഖലയില്‍ നിരവധി പ്രദേശങ്ങള്‍ ഒറ്റപ്പെടുകയും ഒട്ടേറെപ്പേർ കുടുങ്ങിക്കിടക്കുകയും ചെയ്തു.