പൊലീസ് സംഘത്തെ ആക്രമിച്ച് കവർച്ചക്കേസിലെ പ്രതിയെ മോചിപ്പിച്ച സംഭവം: മകനടക്കം 2 പേർ അറസ്റ്റിൽ

കോട്ടിക്കുളം: പൊലീസ് സംഘത്തെ അക്രമിച്ച് കവർച്ചക്കേസിലെ പ്രതിയെ മോചിപ്പിച്ച  സംഭവത്തിൽ മകനടക്കം 2 പേരെ പൊലീസ് അറസ്റ്റ് ചെയ്തു. ഉദുമ കണിയം പാടിയിലെ മുഹമ്മദ് ബിലാൽ (22) ബാര ബങ്കണ തൊട്ടി ബങ്കണ ഹൗസിലെ മുഹമ്മദ് അമീൻ ( 32 ) എന്നിവരെയാണ് പൊലീസ് അറസ്റ്റ് ചെയ്തത്. ഹൊസ്ദുർഗ് ജുഡീഷ്യൽ ഒന്നാം ക്ലാസ് മജിസ്ട്രേറ്റ് (രണ്ട് ) കോടതിയിൽ ഹാജരാക്കിയ ഇവരെ  റിമാൻഡ് ചെയ്തു. 

മുഹമ്മദ് ബിലാലിന്റെ പിതാവ് കണിയം പാടിയിലെ  മുഹമ്മദ് സലീമിന്റെ പേരിൽ മുംബൈ പൈദുനി പൊലീസ്  സ്റ്റേഷനിൽ റജിസ്റ്റർ ചെയ്ത കേസ്  അന്വേഷിക്കാനായി എത്തിയ മുംബൈ പൊലീസിനെ സഹായിക്കാൻ പോയ ബേക്കൽ  സ്റ്റേഷനിലെ സിവിൽ പൊലീസ് ഓഫിസർ കെ.ടി.ഷാജനെയാണ്  അക്രമിച്ചത്.  പ്രതിയായ മുഹമ്മദ് സലീമിനെ കസ്റ്റഡിയിലെടുത്ത് വാഹനത്തിൽ കയറ്റിയിരുന്നു. ഇതിനിടെ  മകൻ ഉൾപ്പെടെയുള്ളവർ ചേർന്നു പൊലീസിനെ തടയുകയും മർദിക്കുകയും ചെയ്തു. ഇതിനിടെ വാഹനത്തിൽ നിന്നു സലീം  ഇറങ്ങിയോടുകയായിരുന്നു.  പ്രതി മുംബൈയിൽ നിന്നു വീട്ടിലേക്ക് വന്നതറിഞ്ഞാണ്  മുംബൈ പൊലീസ് സ്ഥലത്തെത്തിയത്.