ബെയ്‌ലി പാലത്തിലൂടെ വാഹനങ്ങള്‍ എത്തി, തിരച്ചിൽ വേഗത്തിലാകും; സൗജന്യ സേവനവുമായി ടെലകോം കമ്പനികള്‍
മേപ്പാടി: ഉരുള്‍പൊട്ടല്‍ തകര്‍ത്ത മുണ്ടക്കൈയില്‍ ജീവനോടെയുള്ളവരെയെല്ലാം രക്ഷിച്ചുകഴിഞ്ഞുവെന്ന് സൈന്യം അറിയിച്ചു. വീടുകള്‍ കേന്ദ്രീകരിച്ചാണ് ഇനി രക്ഷാപ്രവര്‍ത്തനം നടക്കുക. സൈന്യം നിര്‍മ്മിച്ച ബെയ്‌ലി പാലത്തിലൂടെ വാഹനങ്ങള്‍ മുണ്ടക്കൈയിലെത്തിയതോടെ രക്ഷാപ്രവര്‍ത്തനത്തിന് ഇനി വേഗം കൂടും.
താങ്ങേകി ടെലകോം കമ്പനികളും
മുണ്ടക്കൈ-ചൂരല്‍മല മേഖലയില്‍ 4ജി സേവനം പുനഃസ്ഥാപിച്ചുവെന്നും വൈദ്യുതി ഇല്ലെങ്കിലും സേവനം മുടങ്ങാതിരിക്കാന്‍ ഡീസല്‍ ജനറേറ്ററുകള്‍ സജ്ജമാക്കിയെന്നും ബി.എസ്.എന്‍.എല്‍ അറിയിച്ചു. കൂടാതെ ജില്ലാ ഭരണകൂടത്തിന് അതിവേഗ ഇന്റര്‍നെറ്റ് സൗകര്യവും ആരോഗ്യവകുപ്പിന് ടോള്‍ഫ്രീ നമ്പറും ബി.എസ്.എന്‍.എല്‍. നല്‍കി.
എയര്‍ടെല്‍, വി, ജിയോ എന്നീ കമ്പനികള്‍ മേഖലയിലെ ഉപഭോക്താക്കള്‍ക്ക് സൗജന്യ ഡാറ്റയും കോളും ലഭ്യമാക്കി. നെറ്റ് വര്‍ക്ക് ലഭ്യത ഉറപ്പാക്കാന്‍ ജിയോ പ്രദേശത്ത് പ്രത്യേകമായി ഒരു ടവര്‍ കൂടി സജ്ജമാക്കി. എയര്‍ടെലിന്റേയും വിയുടേയും കേരളത്തിലെ സ്റ്റോറുകള്‍ ദുരിതാശ്വാസത്തിനുള്ള അവശ്യവസ്തുക്കള്‍ ശേഖരിക്കാനുള്ള കളക്ഷന്‍ സെന്ററുകളായി പ്രവര്‍ത്തിക്കും.
പിന്തുണയുമായി ഗോവയും
ഉരുള്‍പൊട്ടല്‍ ദുരിതാശ്വാസ പ്രവര്‍ത്തനങ്ങൾക്ക് ഗോവ ദുരന്ത നിവാരണ അതോറിറ്റി പിന്തുണ അറിയിച്ചു. ഇക്കാര്യം വയനാട് ജില്ലാ കളക്ടറെ ഇ-മെയിൽ മുഖേനെ അറിയിച്ചു. ദുരന്തത്തില്‍ ഗോവ ദുരന്ത നിവാരണ അതോറിറ്റി അനുശോചനം രേഖപ്പെടുത്തി.
വയനാടിന് കൈത്താങ്ങേകാന്‍ ബംഗാള്‍
മുണ്ടക്കൈ-ചൂരൽമല ഉരുൾപൊട്ടൽ ദുരന്തത്തിൽ അനുശോചിച്ച് ബംഗാൾ മുഖ്യമന്ത്രി മമത ബാനര്‍ജി. ദുരിതബാധിതർക്ക് എല്ലാ പിന്തുണയും അറിയിച്ച മമത, എം.പിമാരായ സാകേത് ഗോഖ്‌ലെയും സുസ്മിത ദേവും ദുരന്തബാധിത പ്രദേശങ്ങള്‍ സന്ദര്‍ശിക്കുമെന്നും എക്സിൽ കുറിച്ചു. എം.പിമാര്‍ രണ്ട് ദിവസം വയനാട്ടില്‍ തുടരുകയും ദുരിതമനുഭവിക്കുന്ന കുടുംബങ്ങളുടെ ക്ഷേമത്തിനായി പൂര്‍ണ സഹകരണവും സഹായങ്ങളും നല്‍കുകയും ചെയ്യും.
ഹെലികോപ്റ്റര്‍ സജ്ജമാക്കി കോസ്റ്റ് ഗാര്‍ഡ്, അവശ്യവസ്തുക്കളുമായി കപ്പല്‍
വയനാട്ടിലെ രക്ഷാപ്രവര്‍ത്തനം ശക്തിപ്പെടുത്താനായി അഡ്വാന്‍സ്ഡ് ലൈറ്റ് ഹെലികോപ്റ്റര്‍ (എ.എല്‍.എച്ച്) സജ്ജമാക്കി ഇന്ത്യന്‍ കോസ്റ്റ് ഗാര്‍ഡ്. കോഴിക്കോട്ടെ കോസ്റ്റ് ഗാര്‍ഡ് എയര്‍ എന്‍ക്ലേവില്‍ നിന്നാണ് ഹെലികോപ്റ്റര്‍ എത്തുക. രക്ഷാപ്രവര്‍ത്തനത്തിനും അവശ്യവസ്തുക്കള്‍ എയര്‍ഡ്രോപ്പ് ചെയ്യാനുമായി ഇത് ഉപയോഗിക്കും.
ദുരിതാശ്വാസ ക്യാമ്പുകളിലേക്കുള്ള അവശ്യവസ്തുക്കള്‍, ജീവന്‍രക്ഷാ ഉപകരണങ്ങള്‍, മരുന്നുകള്‍, കുടിവെള്ളം എന്നിവയുമായി കോസ്റ്റ് ഗാര്‍ഡിന്റെ കപ്പല്‍ കോഴിക്കോട്ടേക്ക് പുറപ്പെട്ടു. ഐ.സി.ജി.എസ്. അഭിനവ് എന്ന കപ്പലാണ് കൊച്ചിയില്‍നിന്ന് ബേപ്പൂര്‍ തുറമുഖത്തേക്ക് യാത്ര തിരിച്ചത്.
ശാസ്ത്ര സാങ്കേതിക സ്ഥാപനങ്ങള്‍ക്ക് വിലക്ക്
വയനാട്ടിലെ ദുരന്തബാധിത പ്രദേശമായ മേപ്പാടി പഞ്ചായത്ത് സന്ദര്‍ശിക്കുന്നതില്‍നിന്ന് സംസ്ഥാനത്തെ ശാസ്ത്ര സാങ്കേതിക സ്ഥാപനങ്ങളെ വിലക്കി. തങ്ങളുടെ അഭിപ്രായങ്ങളും പഠന റിപ്പോര്‍ട്ടുകളും മാധ്യമങ്ങളുമായി പങ്കുവെയ്ക്കുന്നതില്‍ നിന്ന് ശാസ്ത്രസമൂഹം വിട്ടുനില്‍ക്കണമെന്നും സര്‍ക്കാര്‍ നിര്‍ദേശിച്ചു.