കുമ്പള GHSS-ൽ വിദ്യാർത്ഥി സുരക്ഷയ്ക്ക് സ്കൂൾ പ്രൊട്ടക്ഷൻ ഗ്രൂപ്പ് രൂപീകരിച്ചു

കുമ്പള: കാസർഗോഡ് ജില്ലയിലെ ഏറ്റവും കൂടുതൽ വിദ്യാർത്ഥികൾ പഠിക്കുന്ന സർക്കാർ വിദ്യാലയമായ കുമ്പള ഗവൺമെൻ്റ് ഹയർ സെക്കൻഡറി സ്കൂളിൽ (GHSS) വിദ്യാർത്ഥികളുടെ സുരക്ഷ ഉറപ്പാക്കുന്നതിനും കുറ്റകൃത്യങ്ങളിൽ നിന്നും ലഹരിവസ്തുക്കളുടെ ഉപയോഗത്തിൽ നിന്നും അവരെ സംരക്ഷിക്കുന്നതിനുമായി സ്കൂൾ പ്രൊട്ടക്ഷൻ ഗ്രൂപ്പ് (SPG) സമിതി രൂപീകരിച്ചു.
വിദ്യാലയങ്ങളിൽ സുരക്ഷിതമായ പഠനാന്തരീക്ഷം ഒരുക്കുക എന്ന ലക്ഷ്യത്തോടെയാണ് SPG പ്രവർത്തിക്കുന്നത്. ഇതൊരു ഔദ്യോഗിക സംവിധാനമാണ്.
SPG ഘടന:
* ചെയർപേഴ്സൺ: പ്രിൻസിപ്പാൾ/സ്ഥാപനത്തിൻ്റെ തലവൻ
* കൺവീനർ: ലോക്കൽ പോലീസ് സ്റ്റേഷൻ ഓഫീസർ (SHO)
* വാർഡ് മെമ്പർ/കൗൺസിലർ
* പി.ടി.എ. പ്രസിഡൻ്റ്
* സ്കൂൾ ലീഡർ
* രണ്ട് രക്ഷകർത്താക്കൾ
* രണ്ട് അധ്യാപകർ
* പ്രദേശത്തെ ഒരു വ്യാപാരി
* ഒരു ഓട്ടോ ഡ്രൈവർ
* സ്റ്റുഡൻ്റ് പോലീസ് കേഡറ്റ് (SPC) പ്രതിനിധി (ഉണ്ടെങ്കിൽ)
* പ്രദേശത്തെ മറ്റ് മാന്യരായ പൗരന്മാർ
പ്രധാന ചുമതലകൾ:
* സ്കൂൾ പരിസരത്തെ ട്രാഫിക് സുരക്ഷ ഉറപ്പാക്കുക.
* ലഹരിവസ്തുക്കൾ, മയക്കുമരുന്നുകൾ, പുകയില ഉൽപ്പന്നങ്ങൾ, അശ്ലീല വസ്തുക്കൾ എന്നിവയുടെ വിൽപ്പനയെക്കുറിച്ചുള്ള വിവരങ്ങൾ ശേഖരിച്ച് അധികാരികളെ അറിയിക്കുക.
* ക്ലാസ് സമയത്ത് സ്കൂളിൽ നിന്ന് മാറി കറങ്ങുന്ന കുട്ടികളെക്കുറിച്ചുള്ള വിവരങ്ങൾ കണ്ടെത്തുക.
* കുട്ടികളെ ചൂഷണം ചെയ്യാനോ നിയമവിരുദ്ധമായ പ്രവർത്തനങ്ങൾക്ക് ഉപയോഗിക്കാനോ ശ്രമിക്കുന്നവരെ നിരീക്ഷിക്കുക.
* ലഹരി ഉപയോഗം, അധ്യാപകരുടെ ദുരുപയോഗം, മറ്റ് പ്രശ്നങ്ങൾ എന്നിവ പേര് വെളിപ്പെടുത്താതെ രേഖപ്പെടുത്താൻ കഴിയുന്ന അജ്ഞാത പരാതിപ്പെട്ടികൾ (Anonymous Complaint Box) സ്ഥാപിക്കാനുള്ള പദ്ധതികൾ നടപ്പിലാക്കുകയും അവ പോലീസ് ഉദ്യോഗസ്ഥൻ നേരിട്ട് പരിശോധിച്ച് ആവശ്യമായ നടപടികൾ സ്വീകരിക്കുകയും ചെയ്യും.
SPG രൂപീകരണ യോഗം പ്രിൻസിപ്പാൾ സിന്ധു ടീച്ചറുടെ സ്വാഗത പ്രസംഗത്തോടെ ആരംഭിച്ചു. പി.ടി.എ. പ്രസിഡൻ്റ് എ.കെ. ആരിഫ് അധ്യക്ഷത വഹിച്ചു. കാസറഗോഡ് ബ്ലോക്ക് പഞ്ചായത്ത് സ്ഥിരം സമിതി അംഗം അഷ്റഫ് കർളെ യോഗം ഉദ്ഘാടനം ചെയ്തു. കുമ്പള അസിസ്റ്റൻ്റ് സബ് ഇൻസ്പെക്ടർ ബാബു ടി.വി. ആമുഖ പ്രഭാഷണം നടത്തി. എസ്.എം.സി. ചെയർമാൻ അഹമ്മദ് അലി, എച്ച്.എം. ഷൈലജ ടീച്ചർ, എം.പി.ടി.എ. പ്രസിഡൻ്റ് വിനീഷ സജി, പി.ടി.എ. വൈസ് പ്രസിഡൻ്റുമാരായ മൊയ്തീൻ അസീസ്, രത്നാകരൻ, സീനിയർ അധ്യാപകരായ രവി മുല്ലച്ചേരി, മധുസൂദനൻ, സ്റ്റാഫ് സെക്രട്ടറി പ്രിയ ടീച്ചർ, കൗൺസിലർ അശ്വതി ടീച്ചർ, പി.ടി.എ. എക്സിക്യൂട്ടീവ് അംഗങ്ങളായ സഹീറ ലത്തീഫ്, കെ.ബി. യൂസഫ്, വ്യാപാരി പ്രതിനിധി സവാദ്, ഓട്ടോ പ്രതിനിധി ദിനേശ്, നിസാം ചോനമ്പാടി, വിദ്യാർത്ഥി നേതാവ് ജംഷീർ മൊഗ്രാൽ, മുരളീധരൻ,   എന്നിവർ സംസാരിച്ചു. ഷിബിൻ കുമാർ എ.കെ. നന്ദി പറഞ്ഞു.