മംഗളൂരുവിലെ പ്രശസ്ത നീന്തല്‍ താരം കുളത്തില്‍ മുങ്ങിമരിച്ചു
മംഗളൂരു: മംഗളൂരുവിലെ പ്രശസ്ത നീന്തല്‍ താരം കെ. ചന്ദ്രശേഖർ റായ് സുരികുമേരു (52) മംഗളൂരു സിറ്റി കോർപറേഷൻ നീന്തല്‍ക്കുളത്തില്‍ മുങ്ങിമരിച്ചു.ബണ്ട്വാള്‍ താലൂക്കിലെ കല്ലഡ്കക്കടുത്ത സുരികുമേരു സ്വദേശിയായ റായ് മംഗളൂരു കുദ്രോളിയിലാണ് താമസിച്ചിരുന്നത്.
ഭാര്യയും ഒരു മകളുമുണ്ട്. ഉഡുപ്പിയിലെ നീന്തല്‍ക്കുളത്തില്‍ കരാർ അടിസ്ഥാനത്തില്‍ ലൈഫ് ഗാർഡായി ജോലി ചെയ്തിരുന്ന അദ്ദേഹം മൂന്ന് വർഷമായി എംസിസി നീന്തല്‍ക്കുളത്തിന്‍റെ മാനേജരായി പ്രവർത്തിക്കുകയായിരുന്നു. ലൈഫ് ഗാർഡായും നീന്തല്‍ പരിശീലകനായും അദ്ദേഹം ജോലി ചെയ്തിരുന്നു.
രാവിലെ കുറച്ചുനേരം പരിശീലിക്കാമെന്ന് പറഞ്ഞ് റായ് തന്‍റെ മൊബൈല്‍ ഫോണ്‍ പൂളിലെ സുരക്ഷാ ജീവനക്കാരന് നല്‍കിയതായി പറയപ്പെടുന്നു. ഹൃദയാഘാതമാണ് മരണകാരണമെന്നാണ് വിവരം. മൃതദേഹം ജില്ലാ വെൻലോക്ക് ആശുപത്രിയില്‍ പോസ്റ്റ്‌മോർട്ടം നടത്തി.