രഹസ്യവിവരത്തെ തുടർന്ന് പൊലീസെത്തി; മണൽകടത്തിന് ഉപയോഗിക്കുന്ന തോണി പിടിച്ചെടുത്തു

കുമ്പള ∙ മണൽകടത്തിന് ഉപയോഗിക്കുന്ന തോണി കുമ്പള പൊലീസ് പിടിച്ചെടുത്തു നശിപ്പിച്ചു. ആരിക്കാടി പുഴയിൽ മണൽകടത്തിന് ഉപയോഗിക്കുന്ന കടത്തു തോണിയാണു രഹസ്യവിവരത്തെ തുടർന്ന് പൊലീസെത്തി കണ്ടെത്തിയത്. റജിസ്ട്രേഷനില്ലാത്ത ഈ തോണി അനധികൃതമായി മണൽ കടത്തുന്നതിന് ഉപയോഗിക്കുന്നതാണെന്ന് പൊലീസ് അറിയിച്ചു. സമീപത്തു ചാക്കിൽ പുഴ മണലും സൂക്ഷിച്ചിരുന്നു. ഇവിടെ നിന്നു മണൽ കടത്തുന്നുവെന്ന വ്യാപക പരാതിയുയർന്നതിനെ തുടർന്നാണു പരിശോധന കർശനമാക്കിയത്. സിഐ ആർ.പ്രശോഭ്, എസ്ഐ വി.കെ.അനീഷ്, സിപിഒ സൂധീർ എന്നിവരാണു പരിശോധനാ സംഘത്തിലുണ്ടായിരുന്നത്