റഷ്യന് വ്യോമസേന ഖാര്കിവില് ഇറങ്ങി, ആശുപത്രി ആക്രമിച്ചു: യുക്രൈന് സൈന്യം
റഷ്യന് അധിനിവേശം ഏഴാം ദിവസത്തിലേക്ക് കടക്കുന്നതിനിടെ, യുക്രൈനിലെ രണ്ടാമത്തെ വലിയ നഗരമായ ഖാര്കിവില് റഷ്യന് വ്യോമസേന ഇറങ്ങി. നഗരത്തിലെ ഒരു ആശുപത്രിയെ ശത്രുസൈന്യം ആക്രമിച്ചതായി യുക്രൈനിയന് സൈന്യം അവകാശപ്പെട്ടതായി വാര്ത്താ ഏജന്സി എഎഫ്പി റിപ്പോര്ട്ട് ചെയ്തു. റഷ്യന് സൈന്യത്തിന്റെ ഷെല്ലാക്രമണത്തിനിടെ ചൊവ്വാഴ്ച ഒരു ഇന്ത്യന് വിദ്യാര്ത്ഥി കൊല്ലപ്പെട്ട നഗരം കൂടിയാണ് ഖാര്കിവ്.
“റഷ്യന് വ്യോമസേനാ സൈന്യം ഖാര്കിവില് ഇറങ്ങുകയും ഒരു പ്രാദേശിക ആശുപത്രി ആക്രമിക്കുകയും ചെയ്തു. യുദ്ധം തുടരുകയാണ്,” യുക്രൈനിയന് സേനയെ ഉദ്ധരിച്ച് എഎഫ്പി റിപ്പോര്ട്ട് ചെയ്തു. ചൊവ്വാഴ്ച നടന്ന റഷ്യന് മിസൈല് ആക്രമണത്തില്, നഗരത്തിന്റെ മധ്യഭാഗത്തും പാര്പ്പിട പ്രദേശങ്ങളും ഭരണനിര്വഹണ കെട്ടിടങ്ങളും ഉള്പ്പെടെ ബാധിച്ചതായി ഖാര്കിവ് മേഖലാ മേധാവി ഒലെഗ് സിനെഗുബോവ് പറഞ്ഞു.
യുക്രൈനിയന് പട്ടാളക്കാരും റഷ്യന് പാരാട്രൂപ്പര്മാരും തമ്മില് ഖാര്കിവിലെ ആശുപത്രിയില് നടന്ന വെടിവെപ്പിന്റെ കൂടുതല് വിവരങ്ങള് പുറത്ത്. ഏറ്റുമുട്ടലില് യുക്രൈനിയന് സൈനികര് കൊല്ലപ്പെട്ടിട്ടില്ലെന്ന് ഖാര്കിവ് മേഖലാ പൊലീസ് മേധാവി വോളോഡിമര് തിമോഷ്കോ മാധ്യമപ്രവര്ത്തകരോട് പറഞ്ഞു. നിലവില് ആശുപത്രിക്ക് സമീപമുള്ള സ്ഥിതി നിയന്ത്രണവിധേയമാണെന്നും സുരക്ഷ ശക്തമാക്കിയിട്ടുണ്ടെന്നും അദ്ദേഹം പറഞ്ഞതായി യുക്രൈനിയന് മാധ്യമങ്ങള് റിപ്പോര്ട്ട് ചെയ്യുന്നു.
റഷ്യന് അതിര്ത്തിക്കടുത്തുള്ള റഷ്യന് സംസാരിക്കുന്ന നഗരമായ ഖാര്കിവില് ഏകദേശം 1.4 ദശലക്ഷം ജനസംഖ്യയുണ്ട്. കഴിഞ്ഞ വ്യാഴാഴ്ച പ്രസിഡന്റ് വ്ളാഡിമിര് പുടിന് യുക്രൈനില് അധിനിവേശം ആരംഭിച്ചതുമുതല് ഇത് റഷ്യന് സൈന്യത്തിന്റെ ലക്ഷ്യമായിരുന്നു. കുറഞ്ഞത് 14 കുട്ടികളടക്കം 350-ലധികം സിവിലിയന് അപകടങ്ങള് ഇതുവരെ റിപ്പോര്ട്ട് ചെയ്യപ്പെട്ടിട്ടുണ്ട്. 1,600-ലധികം പേര്ക്ക് പരുക്കേറ്റതായും യുക്രൈന് പ്രസിഡന്റ് വോളോഡിമര് സെലെന്സ്കി പറഞ്ഞു.