‘എല്ദോസ് കുന്നപ്പിളളില് എംഎല്എയുടെ ജാമ്യം റദ്ദാക്കാണം’; സര്ക്കാര് ഹൈക്കോടതിയെ സമീപിച്ചു
കൊച്ചി: ബലാത്സംഗ കേസില് പ്രതിയായ എല്ദോസ് കുന്നപ്പിളളില് എംഎല്എയുടെ ജാമ്യം റദ്ദാക്കാന് സര്ക്കാര് ഹൈക്കോടതിയെ സമീപിച്ചു. പ്രതി അന്വേഷണവുമായി സഹകരിക്കുന്നില്ലെന്നാണ് ഹര്ജിയില് സര്ക്കാര് ആരോപിക്കുന്നത്. ഹര്ജി അല്പസമയത്തിനകം ഹൈക്കോടതി പരിഗണിക്കും.
അതിനിടെ, എല്ദോസ് കുന്നപ്പിളളില് എംഎല്എ പരാതിക്കാരിയെ ആക്രമിച്ചുവെന്ന കേസില് നാല് പേരെ കൂടി പൊലീസ് പ്രതി ചേര്ത്തു. മൂന്ന് അഭിഭാഷകരെയും ഒരു ഓണ്ലൈന് മാധ്യമ പ്രവര്ത്തകനെയുമാണ് കേസില് പ്രതി ചേര്ത്തിരിക്കുന്നത്. അഡ്വ. അലക്സ്, അഡ്വ. സുധീര് , അഡ്വ. ജോസ്, ഓണ്ലൈന് മാധ്യമ പ്രവര്ത്തകന് രാഗം രാധാകൃഷ്ണന് എന്നിവരെയാണ് കേസില് പ്രതി ചേര്ത്തത്.
അഭിഭാഷകരുടെ ഓഫീസില് വച്ച് കേസ് ഒത്തുതീര്ക്കാന് ശ്രമിച്ചുവെന്ന മൊഴിയിലാണ് കേസ്. സ്ത്രീത്വത്തെ അപമാനിക്കല്, കേസില് നിന്നും പിന്മാറാനായി കൃത്രിമ രേഖ ചമയ്ക്കല്, മര്ദ്ദിക്കുക എന്നീ കുറ്റങ്ങള് ചുമത്തിയാണ് എല്ദോസിനെതിരെ കഴിഞ്ഞ ദിവസം വഞ്ചിയൂര് പൊലീസ് കേസ് രജിസ്റ്റര് ചെയ്തത്. എല്ദോസിനെ മാത്രം പ്രതി ചേര്ത്ത കേസിലാണ് നാല് പേരെ കൂടി പ്രതി ചേര്ത്തത്. ഈ കേസില് എല്ദോസിന്റെ മുന്കൂര് ജാമ്യാപേക്ഷയില് ഈ മാസം 31 ന് കോടതി വിധി പറയും.