പലസ്തീന് ജനതയ്ക്ക് സഹായം നല്കുന്നത് തുടരും; മഹ്മൂദ് അബ്ബാസുമായി സംസാരിച്ച് മോദി
ന്യൂഡല്ഹി: ഹമാസ്- ഇസ്രയേല് സംഘര്ഷം രൂക്ഷമായി തുടരുന്നതിനിടെ പലസ്തീന് അതോറിറ്റി പ്രസിഡന്റ് മഹ്മൂദ് അബ്ബാസുമായി സംസാരിച്ച് പ്രധാനമന്ത്രി നരേന്ദ്രമോദി. ഗാസയിലെ അല് അഹ്ലി ആശുപത്രിയിലുണ്ടായ ആക്രമണത്തില് ജീവന് നഷ്ടമായവര്ക്ക് ആദരാഞ്ജലികള് അറിയിച്ചു. എക്സിലൂടെയാണ് പ്രധാനമന്ത്രി ഇക്കാര്യം അറിയിച്ചത്. പലസ്തീന് ജനതയ്ക്ക് സഹായം ലഭ്യമാക്കുന്നത് തുടരുമെന്ന് മഹ്മൂദ് അബ്ബാസിനെ അറിയിച്ചതായി പ്രധാനമന്ത്രി പറഞ്ഞു. മേഖലയിലെ തീവ്രവാദ പ്രവര്ത്തനങ്ങളിലും ആക്രമണങ്ങളിലും സുരക്ഷാ സാഹചര്യം മോശമാവുമന്നതിലും ആശങ്ക രേഖപ്പെടുത്തി. ഇസ്രയേല്- പലസ്തീന് സംഘര്ഷത്തില് ഇന്ത്യയെ ഏറെക്കാലമായി തുടര്ന്നുവരുന്ന നിലപാട് ആവര്ത്തിച്ചതായും നരേന്ദ്രമോദി അറിയിച്ചു. അതിനിടെ, ഗാസയില് കുടുങ്ങിയ ഇന്ത്യക്കാരെ ഉടനെ ഒഴിപ്പിക്കാന് കഴിയുന്ന സാഹചര്യമല്ല നിലവിലുള്ളതെന്ന് വിദേശകാര്യമന്ത്രാലയ വക്താവ് അരിന്ദം ബാഗ്ചി അറിയിച്ചു. വെസ്റ്റ് ബാങ്കില് ഒരാളടക്കം നാലുപേരാണ് കുടുങ്ങിക്കിടക്കുന്നത്. അനുകൂലമായ ആദ്യ അവസരത്തില്തന്നെ ഇവരെ നാട്ടിലെത്തിക്കുമെന്നും ബാഗ്ചി അറിയിച്ചിരുന്നു.