തകര്ത്തടിച്ച് ബാറ്റര്മാര്: ഐപിഎല്ലില് പഞ്ചാബ് കിങ്സിന് തുടര്ച്ചയായ രണ്ടാം ജയം

ലഖ്നൗ: ഐപിഎല്ലില് പഞ്ചാബ് കിങ്സിന് തുടര്ച്ചയായ രണ്ടാം ജയം. ലഖ്നൗ സൂപ്പര് ജയന്റ്സിനെ എട്ടു വിക്കറ്റിനാണ് പഞ്ചാബ് പരാജയപ്പെടുത്തിയത്. ലഖ്നൗ ഉയര്ത്തിയ 172 റണ്സ് വിജയലക്ഷ്യം 16.2 ഓവറില് രണ്ടു വിക്കറ്റ് മാത്രം നഷ്ടപ്പെടുത്തി പഞ്ചാബ് മറികടന്നു. ഓപ്പണര് പ്രഭ്സിമ്രാന് സിങ്, ക്യാപ്റ്റന് ശ്രേയസ് അയ്യര്, നേഹല് വധേര എന്നിവരുടെ വെടിക്കെട്ട് ബാറ്റിങ്ങാണ് പഞ്ചാബിന്റെ ജയം എളുപ്പമാക്കിയത്.
മൂന്നാം ഓവറില് പ്രിയാന്ശ് ആര്യയെ (8) നഷ്ടപ്പെട്ട ശേഷം മൈതാനത്ത് പഞ്ചാബിന്റെ ബാറ്റിങ് വിരുന്നായിരുന്നു. 34 പന്തില് നിന്ന് മൂന്ന് സിക്സും ഒമ്പത് ഫോറുമടക്കം 69 റണ്സെടുത്ത പ്രഭ്സിമ്രാനാണ് അവരുടെ ടോപ് സ്കോറര്. ശ്രേയസ് അയ്യര് വെറും 30 പന്തില് നിന്ന് നാലു സിക്സും മൂന്ന് ഫോറുമടക്കം 52 റണ്സോടെ പുറത്താകാതെ നിന്നു. 25 പന്തുകള് നേരിട്ട നേഹല് വധേര 43 റണ്സുമായി പുറത്താകാതെ നിന്നു. നാലു സിക്സും മൂന്ന് ഫോറുമടങ്ങുന്നതായിരുന്നു നേഹലിന്റെ ഇന്നിങ്സ്.
രണ്ടാം വിക്കറ്റില് പ്രഭ്സിമ്രാന് – ശ്രേയസ് അയ്യര് സഖ്യം 84 റണ്സും മൂന്നാം വിക്കറ്റില് ശ്രേയസ് – നേഹല് സഖ്യം 67 റണ്സും സ്കോര്ബോര്ഡിലേക്ക് ചേര്ത്തു. പഞ്ചാബ് ഇന്നിങ്സില് വീണ രണ്ടു വിക്കറ്റുകളും സ്വന്തമാക്കിയത് ലഖ്നൗ സ്പിന്നര് ദിഗ്വേഷ് സിങ്ങായിരുന്നു.
നേരത്തേ ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ലഖ്നൗ 20 ഓവറില് ഏഴു വിക്കറ്റ് നഷ്ടത്തിലാണ് 171 റണ്സെടുത്തത്. നിക്കോളാസ് പുരന്, ആയുഷ് ബധോനി, ഏയ്ഡന് മാര്ക്രം, അബ്ദുള് സമദ് എന്നിവരുടെ ഇന്നിങ്സുകളാണ് ലഖ്നൗവിനെ 171-ല് എത്തിച്ചത്.
നാലാം പന്തില് തന്നെ മിച്ചല് മാര്ഷിനെ (0) നഷ്ടമായി തകര്ച്ചയോടെയായിരുന്നു ലഖ്നൗവിന്റെ തുടക്കം. വൈകാതെ 18 പന്തില് നിന്ന് 28 റണ്സുമായി മാര്ക്രവും മടങ്ങി. തുടര്ന്നെത്തിയ ക്യാപ്റ്റന് ഋഷഭ് പന്ത് (2) ഈ മത്സരത്തിലും പരാജയമായി.
പിന്നാലെ നാലാം വിക്കറ്റില് 54 റണ്സിന്റെ കൂട്ടുകെട്ടുണ്ടാക്കിയ പുരന് – ബധോനി സഖ്യമാണ് ലഖ്നൗ ഇന്നിങ്സിനെ താങ്ങിനിര്ത്തിയത്. 30 പന്തില് നിന്ന് 44 റണ്സെടുത്ത പുരനെ മടക്കി യുസ്വേന്ദ്ര ചാഹലാണ് ഈ കൂട്ടുകെട്ട് പൊളിച്ചത്. രണ്ട് സിക്സും അഞ്ച് ഫോറുമടങ്ങുന്നതായിരുന്നു താരത്തിന്റെ ഇന്നിങ്സ്. തുടര്ന്നെത്തിയ ഡേവിഡ് മില്ലര്ക്കും (19) പെരുമയ്ക്കൊത്ത പ്രകടനം നടത്താനായില്ല.
പിന്നാലെ ആറാം വിക്കറ്റില് ബധോനി – അബ്ദുള് സമദ് സഖ്യം 47 റണ്സ് കൂട്ടിച്ചേര്ത്ത് സ്കോര് 166-ല് എത്തിച്ചു. 33 പന്തില് നിന്ന് മൂന്ന് സിക്സും ഒരു ഫോറുമടക്കം 41 റണ്സെടുത്ത ബധോനിയേയും 12 പന്തില് നിന്ന് രണ്ട് വീതും സിക്സും ഫോറുമടക്കം 27 റണ്സെടുത്ത സമദിനെയും അവസാന ഓവറില് അര്ഷ്ദീപ് സിങ്ങാണ് പുറത്താക്കിയത്. അര്ഷ്ദീപ് മൂന്നു വിക്കറ്റ് വീഴ്ത്തി.