സമരം അവസാനിച്ചു; വിഴിഞ്ഞം തുറമുഖ നിര്മ്മാണ പ്രവര്ത്തനങ്ങള് പുനരാരംഭിച്ചു
തിരുവനന്തപുരം: വിഴിഞ്ഞം തുറമുഖത്തിനെതിരായ സമരം അവസാനിച്ചതോടെ നിര്മാണ പ്രവര്ത്തനങ്ങള് പുനരാരംഭിച്ചു. പദ്ധതി പ്രദേശത്തേക്ക് കൂടുതല് ലോഡുകള് എത്തിച്ചു.മുല്ലൂര് കവാടത്തിനു മുന്നിലെ സമരപ്പന്തല് ഇന്നലെയാണ് പൊളിച്ചു നീക്കിയത്. പകലും രാത്രിയുമായി നിര്മാണ പ്രവര്ത്തനം നടത്താനാണ് ആലോചന.
സമരം മൂലം നഷ്ടപ്പെട്ട സമയം പരിഹരിക്കാന് ഇരട്ടി വേഗത്തില് നിര്മ്മാണം നടത്താനാണ് അദാനി ഗ്രൂപ്പിന്റെ തീരുമാനം. പുലിമുട്ട് നിര്മ്മാണത്തിനായി പ്രതിദിനം മുപ്പതിനായിരം ടണ് കല്ലിടും. നേരത്തെ 15,000 കല്ലുകളാണ് ഇട്ടിരുന്നത്. കല്ലുകളുമായുള്ള ലോഡുകള് പത്തരയോടെ വിഴിഞ്ഞം തുറമുഖത്ത് എത്തിച്ചു. തുറമുഖ നിര്മ്മാണത്തിന് ആവശ്യമായ മറ്റു സാമഗ്രികളും എത്തിച്ചിട്ടുണ്ട്.
സമരം അവസാനിപ്പിച്ച് പന്തല് പൊളിച്ചെങ്കിലും, ലോഡുകള് വരുന്നത് കണക്കിലെടുത്ത് സ്ഥലത്ത് പൊലീസിനെയും വിന്യസിച്ചിട്ടുണ്ട്. തിരുവനന്തപുരത്തിന് പുറമേ കൊല്ലം തീരത്തുള്ള ബാര്ജുകളും ഉടന് എത്തിക്കും. 400 മീറ്റര് ബെര്ത്ത് നിര്മാണം പൂര്ത്തിയാക്കി 2023 സെപ്റ്റംബറില് ആദ്യ കപ്പല് എത്തിക്കാനാണ് നീക്കം. ആറുമാസത്തിലേറെയായി വിഴിഞ്ഞം തുറമുഖ നിര്മ്മാണം നിര്ത്തിവച്ചിരിക്കുകയായിരുന്നു.