ഇഡി കേസ്, സിദ്ദിഖ് കാപ്പന്റെ ജാമ്യാപേക്ഷയില് വാദം പൂര്ത്തിയായി, വിധി പറയാന് മാറ്റി
ദില്ലി: മലയാളി മാധ്യമപ്രവര്ത്തകന് സിദ്ദിഖ് കാപ്പന്റെ ജാമ്യാപേക്ഷയില് വാദം പൂര്ത്തിയായി. വിധി പറയാന് മാറ്റി. ഇഡി കേസില് ലഖ്നൗ ജില്ലാകോടതിയാണ് സിദ്ദിഖ് കാപ്പന്റെ ജാമ്യാപേക്ഷ പരിഗണിക്കുന്നത്. ഇഡി കേസില് കൂടി ജാമ്യം ലഭിച്ചാലേ പുറത്തിറങ്ങാനാകൂ. യുഎപിഎ കേസില് സുപ്രീംകോടതി ജാമ്യം അനുവദിച്ചെങ്കിലും ഇഡി കേസില് ജാമ്യം ലഭിക്കാതിരുന്നതിനാല് പുറത്തിറങ്ങാന് കഴിഞ്ഞിരുന്നില്ല. 2020 ഒക്ടോബര് അഞ്ചിനാണ് സിദ്ദിഖ് കാപ്പന് അറസ്റ്റിലായത്.
ഹാത്രസിലേക്ക് പോകും വഴി യുപി സര്ക്കാര് യുഎപിഎ ചുമത്തി ജയിലിലടക്കപ്പെട്ട സിദ്ദിഖ് കാപ്പന് കഴിഞ്ഞ മാസം 9 തിനാണ് സുപ്രീംകോടതി ജാമ്യം അനുവദിച്ചത്. യുപി പൊലീസ് കണ്ടെത്തിയ തെളിവുകള് അപര്യാപ്തമാണെന്ന് ചൂണ്ടിക്കാട്ടിയാണ് ചീഫ് ജസ്റ്റിസ് യു യു ലളിത് അധ്യക്ഷനായ ബെഞ്ച് ജാമ്യം നല്കിയത്. അടുത്ത ആറാഴ്ച കാപ്പന് ദില്ലിയില് തങ്ങണം എന്ന നിബന്ധനയിലായിരുന്നു ജാമ്യം. എന്നാല്, ഇഡി രജിസ്റ്റര് ചെയ്ത കേസില് കൂടി ജാമ്യം ലഭിച്ചാല് മാത്രമേ സിദ്ദിഖ് കാപ്പന് പുറത്തിറങ്ങാന് സാധിക്കൂ.
ഹാത്രസില് കൂട്ടബലാത്സംഗത്തിന് ഇരയായി പെണ്കുട്ടി മരിച്ച സ്ഥലത്തേക്ക് പോകും വഴിയാണ് 2020 ഒക്ടോബര് അഞ്ചിന് സിദ്ദിഖ് കാപ്പന് ഉള്പ്പെടെയെുള്ളവര് അറസ്റ്റിലായത്. പോപ്പുലര് ഫ്രണ്ട് പ്രവര്ത്തകര്ക്കൊപ്പം യാത്ര ചെയ്ത സിദ്ദിഖ് കാപ്പന് കലാപത്തിന് ശ്രമിച്ചുവെന്ന് ചൂണ്ടിക്കാട്ടി യുഎപിഎ ചുമത്തിയാണ് യുപി പൊലീസ് അറസ്റ്റ് ചെയ്തത്. തുടര്ന്ന് യുഎപിഎ അടക്കമുള്ള വകുപ്പുകള് ചുമത്തി അറസ്റ്റ് ചെയ്ത കാപ്പന് 22 മാസമായി ജയിലില് തുടരുകയാണ്. മഥുര കോടതിയും അലഹാബാദ് ഹൈക്കോടതിയും ജാമ്യാപേക്ഷ തള്ളിയ സാഹചര്യത്തിലാണ് കാപ്പന് സുപ്രീംകോടതിയിലെത്തിയത്.