കാസർകോട്-മംഗളൂരു സംസ്ഥാനാന്തര പാതയിലെ തിരക്ക്: കൂടുതൽ ബസുകൾ അനുവദിക്കണമെന്ന് ആവശ്യം
ഉപ്പള∙ കാസർകോട്-മംഗളൂരു സംസ്ഥാനാന്തര പാതയിലെ തിരക്ക് നിയന്ത്രിക്കാൻ കൂടുതൽ കെഎസ്ആർടിസി ബസുകൾ അനുവദിക്കണമെന്നു എ.കെ.എം.അഷ്റഫ് എംഎൽഎ നിയമസഭയിൽ ആവശ്യപ്പെട്ടു. രാവിലെയും വൈകിട്ടും ഒട്ടേറെ യാത്രക്കാരാണു ബസിൽ കയറാൻ സാധിക്കാതെ ദുരിതം അനുഭവിക്കുന്നത്.
രാവിലെ കാസർകോട്ടുനിന്ന് ബസ് പുറപ്പെടുമ്പോൾ തന്നെ യാത്രക്കാരുടെ തിരക്ക് അനുഭവപ്പെട്ടു തുടങ്ങും. ഇത് മൂലം മഞ്ചേശ്വരം താലൂക്കിലെ മൊഗ്രാൽ, കുമ്പള, ഉപ്പള, മഞ്ചേശ്വരം അടക്കമുള്ള ഇടത്താവളങ്ങളിൽ നിന്നു യാത്രക്കാർക്കു ബസിലേക്കു കയറാൻ സാധിക്കുന്നില്ല. വൈകിട്ട് തിരിച്ച് മംഗളൂരുവിൽ നിന്നു വരുന്ന സമയത്തും സമാനമായ പ്രതിസന്ധിയാണ് യാത്രക്കാർ നേരിടുന്നത്. ഈ യാത്രാ പ്രതിസന്ധിക്കു പരിഹാരമായി രാവിലെ കാസർകോട്ടു നിന്ന് മംഗളൂരുവിലേക്കും വൈകിട്ട് തിരിച്ച് കാസർകോട്ടേക്കും കൂടുതൽ കെഎസ്ആർടിസി സർവീസുകൾ ഉടൻ അനുവദിക്കണമെന്ന് എംഎൽഎ മന്ത്രി സി.പി.ജോണിനോട് അഭ്യർഥിച്ചു.
വിഷയം എത്രയും വേഗം പരിശോധിച്ച് ആവശ്യമായ നടപടി സ്വീകരിക്കുമെന്നു മന്ത്രി മറുപടി നൽകി. ഇതിനു പുറമേ, മലബാർ മേഖലയിലെ യാത്രാപ്രശ്നം പരിഹരിക്കുന്നതിനായി വിവിധ റൂട്ടുകളിൽ കൂടുതൽ ബസ് സർവീസ് അനുവദിക്കുന്ന കാര്യം സർക്കാരിന്റെ പരിഗണനയിലുണ്ടെന്നും മന്ത്രി അറിയിച്ചു.