സില്വര്ലൈന്: പ്രതിഷേധക്കാര്ക്ക് എതിരായ കേസുകള് പിന്വലിക്കില്ലെന്ന് സര്ക്കാര്
കൊച്ചി: സില്വര്ലൈന് പ്രതിഷേധക്കാര്ക്ക് എതിരായ ക്രിമിനല് കേസുകള് പിന്വലിക്കില്ലെന്ന് സര്ക്കാര്. ഹൈക്കോടതിയിലാണ് സര്ക്കാര് നിലപാട് അറിയിച്ചത്. അതേസമയം ഡിപിആറിന് കേന്ദ്രത്തിന്റെ അനുമതി ഇല്ലെന്നിരിക്കെ സാമൂഹികാഘാത പഠനം നടത്തിയിട്ട് എന്ത് ഗുണമെന്ന് ഹൈക്കോടതി ചോദിച്ചു. ഇത്രയധികം പണം ചെലവാക്കിയതെന്തിന്? ഇപ്പോള് പദ്ധതി എവിടെയെത്തി നില്ക്കുന്നു? ഇത്രയധികം പ്രശ്നങ്ങള് ഉണ്ടാക്കിയതിന് ആര് സമാധാനം പറയും തുടങ്ങിയ ചോദ്യങ്ങള് ഹൈക്കോടതി ഉയര്ത്തി.
പദ്ധതിയുമായി ബന്ധപ്പെട്ട രേഖകള്ക്ക് ആവര്ത്തിച്ച് കത്തയച്ചിട്ടും കെ റെയില് കോര്പ്പറേഷന് നല്കുന്നില്ലെന്ന് കേന്ദ്ര റെയില്വെ മന്ത്രാലയം ഹൈക്കോടതിയില് സത്യവാങ്മൂലം നല്കിയിരുന്നു. പാതയുടെ അലൈന്മെന്റ്, പദ്ധതിയ്ക്കായി ഏറ്റെടുക്കേണ്ട സ്വകാര്യ ഭൂമി, റെയില്വെ ഭൂമി തുടങ്ങിയവയുടെ വിശദാംശങ്ങള് ഇതുവരെ നല്കിയിട്ടില്ല. ഡിപിആര് അപൂര്ണ്ണമാണെന്ന മുന് നിലപാടില് ഉറച്ചു നില്ക്കുന്നതായും റെയില്വെ കോടതിയെ അറിയിച്ചു. പദ്ധതിയ്ക്ക് കേന്ദ്രം സാമ്ബത്തികാനുമതി നല്കിയിട്ടില്ലെന്നും കെ റെയിലിനായി സാമൂഹികാഘാത പഠനവും കല്ലിടലും നടത്തിയത് കേന്ദ്രാനുമതി ഇല്ലാതെയാണെന്നും കേന്ദ്ര സര്ക്കാരും വ്യക്തമാക്കിയിട്ടുണ്ട്.