വ്യാപാരികളുടെ അനിശ്ചിതകാല പണിമുടക്ക്: സംസ്ഥാനത്ത് ഇന്ന് മുതല് റേഷൻ വിതരണം സ്തംഭിക്കും

തിരുവനന്തപുരം: സംസ്ഥാനത്ത് ഇന്ന് മുതല് റേഷൻ വിതരണം സ്തംഭിക്കും. പതിനാലായിരത്തിലധികം വരുന്ന റേഷൻ വ്യാപാരികള് ഇന്നുമുതല് അനിശ്ചിതകാലത്തേക്ക് പണിമുടക്കിലാണ്.
വേതന പാക്കേജ് പരിഷ്കരിക്കാതെ സമരത്തില് നിന്ന് പിന്മാറില്ലെന്നാണ് റേഷൻ വ്യാപാരി സംഘടനകളുടെ നിലപാട്. ഭക്ഷ്യ മന്ത്രിയും ധനമന്ത്രിയും കയ്യൊഴിഞ്ഞതോടെ മുഖ്യമന്ത്രി ഇടപെട്ട് ഉറപ്പുനല്കിയാല് സമരം പിൻവലിക്കാം എന്നാണ് വ്യാപാരികളുടെ തീരുമാനം.
വാതില്പ്പടി വിതരണക്കാർ ഭക്ഷ്യധാന്യങ്ങള് കടകളില് എത്തിച്ചാലും ധാന്യങ്ങള് സ്വീകരിക്കില്ലെന്നും വ്യാപാരികള് അറിയിച്ചിട്ടുണ്ട്. ഗുണഭോക്താക്കള്ക്ക് ഭക്ഷ്യധാന്യങ്ങള് നിഷേധിച്ചാല് ലൈസൻസ് റദ്ദാക്കുന്ന നടപടികളിലേക്ക് കടക്കേണ്ടി വരും എന്നാണ് സർക്കാർ മുന്നറിയിപ്പ്.
ചർച്ചകള് അവസാനിച്ചിട്ടില്ലെന്നും ധനസ്ഥിതി മെച്ചപ്പെടുന്നതിന് അനുസരിച്ച് ശമ്ബള പരിഷ്കരണം വരുത്താമെന്നുമാണ് ഭക്ഷ്യമന്ത്രി വ്യാപാരികളെ അറിയിച്ചിരിക്കുന്നത്. സാധാരണക്കാരായ ജനങ്ങളെ ബുദ്ധിമുട്ടിലാക്കുന്ന തീരുമാനമാണ് വ്യാപാരികളുടെതെന്നും ഭക്ഷ്യ മന്ത്രി പറഞ്ഞു. അർഹരായ ഒരാള്ക്കും റേഷൻ കിട്ടാതെ വരുന്ന സാഹചര്യം ഉണ്ടാകില്ല എന്നും മന്ത്രി ജി.ആർ അനില് വ്യക്തമാക്കി.