സംസ്ഥാനത്ത് ഇന്ന് ശക്തമായ മഴയ്ക്ക് സാധ്യത: ആറ് ജില്ലയില് യെല്ലോ അലര്ട്ട്
തിരുവനന്തപുരം: സംസ്ഥാനത്ത് ഇന്ന് ആറ് ജില്ലയില് മഴ മുന്നറിയിപ്പ്്. ഇടുക്കി, പാലക്കാട്, മലപ്പുറം,കോഴിക്കോട്, വയനാട്,കണ്ണൂര്, ജില്ലകളില് യെല്ലോ അലര്ട്ട് പ്രഖ്യാപിച്ചു. മധ്യ അറബികടലില് തീവ്ര ന്യൂനമര്ദ്ദം സ്ഥിതി ചെയ്യുന്നതിനാല് ശക്തമായ മഴയ്ക്ക് സാധ്യതയുണ്ട്. അടുത്ത നാല് ദിവസത്തിനുള്ളില് രാജ്യത്ത് നിന്ന് കാലവര്ഷം പൂര്ണമായും വിടവാങ്ങാന് സാധ്യതയുണ്ടെന്ന് കാലാവസ്ഥാ വിഭാഗം അറിയിച്ചു.
ന്യൂനമര്ദ പാത്തി തെക്കന് കേരളത്തിന് കുറുകെയായി നിലനില്ക്കുന്നുണ്ട്. മധ്യ തെക്കന് ബംഗാള് ഉള്ക്കടലില് മറ്റൊരു ന്യൂനമര്ദ്ദവും രൂപപ്പെട്ടേക്കും. ഇതിന്റെയെല്ലാം സ്വാധീനഫലമായി ഈ ദിവസങ്ങളില് കേരളത്തില് മഴ കനക്കാനാണ് സാധ്യത. നാലു ദിവസത്തിനു ശേഷം തെക്കേ ഇന്ത്യയില് തുലാവര്ഷം ആരംഭിക്കാനാണ് സാധ്യത. മഴ ശക്തമാകുന്ന സാഹചര്യത്തില് കേരളാ തീരത്ത് മല്സ്യബന്ധത്തിന് വിലക്ക് ഉണ്ട്. ഉയര്ന്ന തിരമാലകള്ക്കും കള്ളക്കടല് പ്രതിഭാസത്തിനും സാധ്യതയുണ്ടെന്ന മുന്നറിയിപ്പിന്റെ അടിസ്ഥാനത്തിലാണ് മല്സ്യബന്ധത്തിന് വിലക്കേര്പ്പെടുത്തിയത്.