രോഗിയുമായി സൈറണ് മുഴക്കി പാഞ്ഞെത്തിയ ആംബുലൻസ്: കുമ്പള ടോള് പ്ലാസയിലെത്തിയതും കുടുങ്ങി; മിനിട്ടുകളോളം കിടന്നിട്ടും ഗേറ്റ് തുറക്കാതെ അധികൃതര്
കാസർകോട്: കുമ്പള ആരിക്കാടി ടോള് പ്ലാസയില് പരീക്ഷണാടിസ്ഥാനത്തില് ടോള് പിരിവ് തുടങ്ങിയതോടെ യാത്രക്കാർ വലയുന്നു.
ബുധനാഴ്ച ടോള് പിരിവ് ആരംഭിച്ചതിന് പിന്നാലെ മംഗലാപുരത്തേക്ക് ഗുരുതരാവസ്ഥയിലുള്ള രോഗിയുമായി പോയ ആംബുലൻസ് പത്തു മിനിറ്റോളം ടോള് ബൂത്തില് കുടുങ്ങിക്കിടന്നു. സൈറണ് മുഴക്കിയിട്ടും ടോള് അധികൃതർ ബാരിക്കേഡ് തുറന്നു വിടാൻ തയ്യാറായില്ലെന്നാണ് പരാതി.
ബുധനാഴ്ച രാവിലെ ടോള് പിരിവ് ആരംഭിച്ചതോടെ പ്ലാസയ്ക്ക് ഇരുവശത്തും വാഹനങ്ങളുടെ നീണ്ട നിര പ്രത്യക്ഷപ്പെട്ടിരുന്നു. ഇതിനിടയിലേക്കാണ് രോഗിയുമായി വന്ന ആംബുലൻസ് എത്തിയത്. ആംബുലൻസ് കുടുങ്ങിക്കിടക്കുന്ന ദൃശ്യങ്ങള് സോഷ്യല് മീഡിയയില് പ്രചരിച്ചതോടെ ടോള് അധികൃതർക്കെതിരെ വലിയ ജനരോഷമാണ് ഉയരുന്നത്. അടിയന്തര സാഹചര്യങ്ങളില് ആംബുലൻസുകള്ക്ക് മുൻഗണന നല്കണമെന്ന ചട്ടം ലംഘിക്കപ്പെട്ടതായാണ് ആക്ഷേപം.