വിപണിയിൽ അവശ്യസാധനങ്ങളുടെ വിലയും ലഭ്യതയും ഉറപ്പുവരുത്തുന്നതിന് കർശന നിരീക്ഷണവുമായി യുഎഇ

അബുദാബി: രാജ്യത്തെ വിപണികളിൽ അവശ്യസാധനങ്ങളുടെ വിലയും ലഭ്യതയും ഉറപ്പുവരുത്തുന്നതിനായി കർശനമായ നിരീക്ഷണ നടപടികളുമായി യുഎഇ സാമ്പത്തിക-വിനോദസഞ്ചാര മന്ത്രാലയം രംഗത്ത്. വിപണിയിൽ സ്ഥിരത നിലനിർത്തുന്നതിനും അനാവശ്യമായ വിലക്കയറ്റം തടയുന്നതിനുമായി മന്ത്രാലയത്തിന്റെ നേതൃത്വത്തിൽ രാജ്യവ്യാപകമായി ദിവസേനയുള്ള പരിശോധനകൾ ശക്തമാക്കിയിട്ടുണ്ട്.

∙ വിപണിയിലെ നിരീക്ഷണവും വില നിയന്ത്രണവും
പ്രാദേശിക സാമ്പത്തിക വികസന വകുപ്പുകളുമായി സഹകരിച്ചാണ് മന്ത്രാലയം സംയുക്ത ദേശീയ നിരീക്ഷണ സംഘത്തെ സജ്ജമാക്കിയിരിക്കുന്നത്. പാചക എണ്ണ, മുട്ട, പാൽ ഉൽപന്നങ്ങൾ, അരി, പഞ്ചസാര, കോഴിയിറച്ചി, പയറുവർഗങ്ങൾ, റൊട്ടി, ഗോതമ്പ് എന്നിങ്ങനെ ഒൻപത് അവശ്യവസ്തുക്കളുടെ വില മന്ത്രാലയത്തിന്റെ മുൻകൂർ അനുമതിയില്ലാതെ വർധിപ്പിക്കാൻ പാടില്ലെന്ന് കർശന നിർദ്ദേശം നൽകിയിട്ടുണ്ട്. സവാള, തക്കാളി തുടങ്ങിയ ചില ഭക്ഷ്യവസ്തുക്കളുടെ വിലയിൽ കഴിഞ്ഞ ദിവസങ്ങളിൽ കണ്ട വർധനവ് പ്രാദേശിക പ്രതിസന്ധികൾ മൂലമുള്ള താൽക്കാലിക പ്രതിഭാസം മാത്രമാണെന്നും അവയുടെ വിതരണം സുഗമമാക്കുന്നതിനായി അധിക ശേഖരം വിപണിയിലെത്തിച്ചിട്ടുണ്ടെന്നും മന്ത്രാലയം വ്യക്തമാക്കി. വിപണിയിൽ അവശ്യസാധനങ്ങൾക്ക് ഒട്ടും ക്ഷാമമില്ലെന്നും പകരം സംവിധാനങ്ങൾ ലഭ്യമാണെന്നും അധികൃതർ ഉറപ്പുനൽകുന്നു.

അവശ്യസാധനങ്ങളുടെ കരുതൽ ശേഖരം യുഎഇയുടെ പക്കലുണ്ട്. രാജ്യത്തിന്റെ വിവിധ ഭാഗങ്ങളിലായി ചിട്ടയായ രീതിയിൽ ക്രമീകരിച്ചിരിക്കുന്ന ഈ ശേഖരം വിതരണ ശൃംഖലയുടെ കാര്യക്ഷമത വർദ്ധിപ്പിക്കുന്നു. ചരക്ക് നീക്കവും വിതരണവും ഇപ്പോൾ വളരെ കൃത്യമായും തടസ്സമില്ലാതെയും നടക്കുന്നുണ്ട്. വിവിധ രാജ്യങ്ങളുമായുള്ള വ്യാപാര പങ്കാളിത്തം വഴി ഏതു പ്രതിസന്ധിഘട്ടത്തിലും ബദൽ മാർഗ്ഗങ്ങളിലൂടെ സാധനങ്ങൾ എത്തിക്കാൻ യുഎഇ സജ്ജമാണ്.

∙ പരിശോധനകളും നിയമനടപടികളും
പ്രാദേശിക സാമ്പത്തിക വികസന വകുപ്പുകളുമായി ചേർന്ന് ഇതുവരെ 7,105 പരിശോധനകളാണ് മന്ത്രാലയം നടത്തിയത്. ഇതിൽ അനാവശ്യമായ വിലക്കയറ്റം ഉൾപ്പെടെയുള്ള 567 നിയമലംഘനങ്ങൾ കണ്ടെത്തുകയും 449 താക്കീതുകൾ നൽകുകയും ചെയ്തു. നിയമലംഘനം നടത്തിയവർക്ക് ആകെ 207,250 ദിർഹം പിഴയും ചുമത്തി. വരും ദിവസങ്ങളിൽ പരിശോധനകൾ കൂടുതൽ ശക്തമാക്കാനാണ് മന്ത്രാലയത്തിന്റെ തീരുമാനം.

∙ ഉപഭോക്താക്കൾക്കുള്ള നിർദ്ദേശം
വിപണിയിലെ വിലക്കയറ്റത്തെക്കുറിച്ച് പരാതികളുണ്ടെങ്കിൽ മന്ത്രാലയത്തിന്റെ ഔദ്യോഗിക വെബ്സൈറ്റ് വഴിയോ, 8001222 എന്ന നമ്പറിലോ, info@moet.gov.ae എന്ന ഇമെയിൽ വഴിയോ ഉപഭോക്താക്കൾക്ക് റിപ്പോർട്ട് ചെയ്യാവുന്നതാണ്. റമസാൻ കാലയളവിൽ അനാവശ്യമായ പരിഭ്രാന്തി ഒഴിവാക്കണമെന്നും, ആവശ്യത്തിന് മാത്രം സാധനങ്ങൾ വാങ്ങണമെന്നും അമിതമായി സാധനങ്ങൾ ശേഖരിച്ചുവെക്കുന്നത് ഒഴിവാക്കണമെന്നും മന്ത്രാലയം ഉപഭോക്താക്കളോട് അഭ്യർത്ഥിച്ചു. ഉപഭോക്താക്കളുടെ ജാഗ്രത വിപണിയുടെ സ്ഥിരതയ്ക്ക് അത്യന്താപേക്ഷിതമാണെന്നും ഓർമിപ്പിച്ചു.