പന്നിയുടെ വൃക്ക മനുഷ്യശരീരത്തിൽ പ്രവർത്തിച്ചത് 271 ദിവസം! അദ്ഭുത നേട്ടവുമായി ശാസ്ത്രലോകം

അവയവമാറ്റ ശസ്ത്രക്രിയാ രംഗത്ത് വിപ്ലവകരമായ കുതിച്ചുചാട്ടത്തിന് വഴിതുറന്ന് യുഎസ് വൈദ്യശാസ്ത്ര ലോകം. പന്നിയിൽ നിന്ന് മാറ്റിവെച്ച വൃക്ക മനുഷ്യശരീരത്തിൽ 271 ദിവസം വിജയകരമായി പ്രവർത്തിച്ച് ചരിത്രത്തിലെ ഏറ്റവും ദൈർഘ്യമേറിയ റെക്കോർഡ് കുറിച്ചു. യുഎസിലെ മാസ് ജനറൽ ബ്രിഗാം ആശുപത്രിയിലെ വിദഗ്ധ ഡോക്ടർമാരുടെ സംഘമാണ് ഈ അപൂർവ നേട്ടത്തിന് പിന്നിൽ.

ടൈപ്പ്-2 പ്രമേഹം മൂലം വൃക്കകൾ പൂർണമായും പ്രവർത്തനരഹിതമായ ടൈം ആൻഡ്രൂസ് (66) എന്ന യുഎസ് പൗരനിലാണ് ഈ പരീക്ഷണം നടത്തിയത്. അവയവദാനത്തിനായുള്ള നീണ്ട കാത്തിരിപ്പിനും ഡയാലിസിസിന്റെ ബുദ്ധിമുട്ടുകൾക്കുമിടയിൽ മനുഷ്യജീവൻ നിലനിർത്താൻ മൃഗങ്ങളുടെ അവയവങ്ങൾ ഒരു ‘താൽക്കാലിക പാലമായി’ ഉപയോഗിക്കാമെന്ന് ഈ വിജയം തെളിയിക്കുന്നു.

∙ പ്രതീക്ഷയുടെ 271 ദിവസങ്ങൾ
2025 ജനുവരി 25 നാണ് ടൈം ആൻഡ്രൂസിന് പന്നിയുടെ വൃക്ക മാറ്റിവയ്ക്കൽ ശസ്ത്രക്രിയ നടന്നത്. ശസ്ത്രക്രിയയ്ക്ക് തൊട്ടുപിന്നാലെ തന്നെ വൃക്ക സ്വാഭാവികമായി പ്രവർത്തിച്ചു തുടങ്ങി. തുടർന്ന് 271 ദിവസത്തോളം (ഏകദേശം 9 മാസം) ഒരു തടസ്സവുമില്ലാതെ ഈ അവയവം അദ്ദേഹത്തിന്റെ ശരീരത്തിൽ രക്തശുദ്ധീകരണം നടത്തി.

ആഴ്ചതോറും ആശുപത്രിയിൽ കയറിയിറങ്ങി മണിക്കൂറുകളോളം ഡയാലിസിസ് മെഷീന് മുന്നിൽ ചെലവഴിക്കേണ്ടിവന്ന ആൻഡ്രൂസിന് വലിയൊരു ആശ്വാസമായിരുന്നു ഈ ശസ്ത്രക്രിയ. “ഡയാലിസിസ് മെഷീനിൽ നിന്ന് മുക്തി നേടി സ്വന്തം ജീവിതത്തിലേക്ക് തിരികെ വരാൻ എനിക്ക് ലഭിച്ച വലിയൊരു പ്രതീക്ഷയായിരുന്നു ഇത്. ഇരുളടഞ്ഞ ജീവിതത്തിന്റെ അറ്റത്ത് കണ്ട വെളിച്ചം,” ആൻഡ്രൂസ് തന്റെ അനുഭവത്തെക്കുറിച്ച് ഓർത്തെടുത്തു.

∙ എന്തുകൊണ്ട് പന്നിയുടെ വൃക്ക? ജനിതകമാറ്റത്തിന്റെ ശാസ്ത്രം
സാധാരണ ഒരു പന്നിയുടെ വൃക്ക നേരിട്ട് മനുഷ്യശരീരത്തിൽ വച്ചുപിടിപ്പിക്കാൻ സാധിക്കില്ല. മനുഷ്യന്റെ പ്രതിരോധ വ്യവസ്ഥ ആ അവയവത്തെ ഒരു അന്യവസ്തുവായി നിമിഷങ്ങൾക്കകം തിരിച്ചറിയുകയും ആക്രമിച്ചു നശിപ്പിക്കുകയും ചെയ്യും. രക്തം കട്ടപിടിച്ച് മിനിറ്റുകൾക്കകം അവയവം പ്രവർത്തനരഹിതമാവുകയാണ് പതിവ്.